झापा,४ फागुन । झापाको बाह्रदशीमा रहेको अदुवा खोला सिँचाई आयोजना अघिल्लो समितिको अस्पष्ट आर्थिक हिसाबका कारण अलपत्र परेको छ । बिर्तामोड–१० र बाह्रदशी–५ मा फैलिएको यो आयोजना क्षेत्रकै ठुलो सिँचाई परियोजना हो । आयोजनाका वर्तमान अध्यक्ष मानप्रसाद संग्रौलाका अनुसार अघिल्लो समितिले स्पष्ट हिसाब नबुझाएपछि संस्था नविकरण हुन सकेको छैन । नविकरण नहुँदा प्रदेश र संघीय सरकारबाट आउने बजेटसमेत रोकिएको छ । यसले ८ सय विघाभन्दा बढी जमिनमा सिँचाइ हुने किसान प्रत्यक्ष प्रभावित भएका छन् ।
संग्रौलाले अघिल्लो समितिमाथि ठुलो आर्थिक चलखेल भएको मुद्दा अख्तियारमा विचाराधीन रहेको जानकारी दिनु भयो । २०८१ पुस ८ गते कार्यभार सम्हालेको केही दिनमै अख्तियारबाट पत्र आएपछि आफू चकित भएको उहाँले बताउनु भयो ।
अघिल्लो समितिमा अध्यक्ष दिनेश थापा, सचिव प्रकाश पाठक र कोषाध्यक्ष लोकबहादुर ओली रहनु भएको छ । बैंक स्टेटमेन्टअनुसार अध्यक्ष थापाको नाममा साढे ४ लाख, सचिव पाठकको नाममा ५ लाख र कोषाध्यक्ष ओलीको नाममा २ लाखभन्दा बढी रुपैयाँ निकालिएको देखिन्छ । तर सो कारोबार अघिल्लो समितिले बुझाएको हिसाबमा उल्लेख छैन ।
धरौटी खाताबाट रकम निकालेर पुनः जम्मा गरिएको विषय हिसाबमा नदेखिँदा अहिले लेखापरीक्षणमा समस्या आएको संग्रौलाको भनाइ छ । यसै कारण संस्था नविकरण र नयाँ बजेटको बाटो बन्द भएको उहाँले बताउनु भयो ।
यता पूर्वअध्यक्ष थापाले प्रक्रियागत त्रुटि भएको स्वीकार गर्दै सहमति भए नविकरणमा सहजीकरण गर्ने बताउनु भएको छ ।
