दमक, ५ फागुन, २०८२। झापाको निर्वाचन क्षेत्र नं. ५ को उत्तरी क्षेत्रका बासिन्दाले सिँचाईको सुविधा उपलव्ध गराई दिन नेकपा एमालेका अध्यक्ष एवम् पूर्वप्रधानमन्त्री केपी शर्मा ओली समक्ष माग गरेका छन् । आसन्न प्रतिनिधी सभा सदस्य निर्वाचनका लागि यसै निर्वाचन क्षेत्रका उम्मेद्वार समेत रहनु भएका ओली मंगलबार स्थानीयसँगको भेटघाटका लागि पुग्नु भएको समयमा उनीहरुले सो माग गरेका हुन् । विगतमा सडक, विद्युत, खानेपानी लगायतको सुविधा ओलीकै पहलबाट प्राप्त भएको भन्दै बाँकि सुविधा पनि ओलीकै प्रयासबाट प्राप्त हुनेमा आशावादी रहेको दमक ३ का डिकेन्द्र घिमिरेले बताउनुभयो ।
दमक ३ को दुम्सेमा भएको भेटघाटका क्रममा स्थानीयले सो क्षेत्रमा निर्माणको प्रकृयामा रहेको बिराट बुद्धमुर्ती सहितको पार्कलाई गति दिन पनि आग्रह गरेका छन् । दमकको दक्षिणी क्षेत्रमा औद्योगीक पार्क, मध्य भागमा भ्युटावर र उत्तरी भेगमा बुद्धमूर्ती सहितको पार्कले दिर्घकालिन रुपमा दमकलाई अन्तर्राष्ट्रिय औद्योगीक र पर्यटकीय सहरको रुपमा विकास गर्ने स्थानीयबासीको अपेक्षा छ ।
अध्यक्ष ओलीले सोमबार समेत दमकका विभिन्न वडा र टोलका मतदाताहरुसँग भेटघाट गर्नु भएको थियो । आज (मंगलबार) समेत उहाँ दमकका विभिन्न स्थानमा हुने भेटघाट र छलफलमा व्यस्त रहनु भएको छ ।
