झापा,८ फागुन । आगामी फागुन २१ गते हुने प्रतिनिधिसभा निर्वाचनका लागि प्रमुख तथा साना राजनीतिक दलहरूले आ–आफ्ना निर्वाचन घोषणापत्र सार्वजनिक गरेका छन्। घोषणापत्रमा अर्थतन्त्र, स्वास्थ्य, शिक्षा, रोजगारीसँगै ऊर्जा र जलविद्युत् क्षेत्रलाई उच्च प्राथमिकता दिइएको छ।
विगतमा लोकप्रिय नारा समेटिएका घोषणापत्र कार्यान्वयन नहुने आलोचना भए पनि यस पटक भने ऊर्जा क्षेत्रमा दलहरूबीच उल्लेखनीय समानता देखिएको छ। नेपाली कांग्रेस, नेकपा एमाले, नेपाल कम्युनिस्ट पार्टी र राष्ट्रिय स्वतन्त्र पार्टीले ऊर्जा विकासलाई आर्थिक समृद्धिको मुख्य आधार मानेका छन्।
दलहरूले अघिल्लो केपी शर्मा ओली नेतृत्वको सरकारले अघि सारेको ऊर्जा मार्गचित्रअनुसार सन् २०३५ सम्म २८ हजार ५०० मेगावाट विद्युत् उत्पादन गर्ने लक्ष्यलाई स्वीकार गरेका छन्। कांग्रेस, एमाले र रास्वपाले पाँच वर्षमा जडित क्षमता १४ हजार मेगावाट र प्रतिव्यक्ति खपत ७५० युनिट पु¥याउने लक्ष्य लिएका छन्। विद्युत् व्यापारमा निजी क्षेत्रको सहभागिता, ‘टेक अर पे’ सिद्धान्तमा पीपीए, जलाशय युक्त आयोजना र अन्तर्देशीय प्रसारण लाइन निर्माणमा पनि दलहरू एकमत देखिन्छन्।
आन्तरिक खपत बढाउने, विद्युतीय चुल्हो र सवारी साधन प्रवद्र्धन गर्ने विषय घोषणापत्रका मुख्य आकर्षण हुन्। यसरी फागुन २१ को निर्वाचनलाई लक्षित घोषणापत्रले जलविद्युत् र स्वच्छ ऊर्जामै नेपालको आर्थिक भविष्य निर्भर छ भन्नेमा बलियो राष्ट्रिय सहमति देखाएको छ।
