झापा,१२ फागुन । फागुन २१ गते हुने प्रतिनिधिसभा निर्वाचनलाई लक्षित गरी आयोजना गरिएको पब्लिक डिबेटमा फेरि विवाद भएको छ। हिजो बिर्तामोडमा झापा क्षेत्र नम्बर २ का उम्मेदवारहरू बीच प्रत्यक्ष संवाद कार्यक्रम चलिरहँदा बहस अवरुद्ध भएको हो। वीरता, सुरुङ्गा, बुधबारे र अर्जुनधारा जेसीजको संयुक्त आयोजनामा अतिथि सदनको सभाहलमा भएको बहसका क्रममा राष्ट्रिय स्वतन्त्र पार्टीका बिर्तामोड नगर सचिव सृजन अधिकारीले कांग्रेस उम्मेदवार सरिता प्रसाईंप्रति आपत्तिजनक अभिव्यक्ति दिएपछि विवाद सुरु भएको थियो।
त्यसपछि कांग्रेस कार्यकर्ताले कडा प्रतिवाद गरे र केहीबेर भनाभन हुँदा कार्यक्रम नै भाँडिएको थियो। होहल्ला बढेपछि कार्यक्रम स्थलमा थप सुरक्षाकर्मी परिचालन गरिएको थियो। नेपाल प्रहरी र सशस्त्र प्रहरी बल खटाइएपछि स्थिति नियन्त्रणमा आएको थियो। विवादका बीच राष्ट्रिय स्वतन्त्र पार्टी र राप्रपाका उम्मेदवार कार्यक्रम छाडेर बाहिरिएका थिए। पछि बाँकी उम्मेदवारहरूलाई सहभागी गराएर आयोजकले कार्यक्रम अघि बढाएका थिए। यसअघि गत बिहीवार पनि न्युज २४ले आयोजना गरेको यस्तै डिबेटमा झापा–२ मा विवाद भएको थियो।
