दमक,१३ फागुन ।नेकपा एमालेका अध्यक्ष तथा पूर्वप्रधानमन्त्री केपी शर्मा ओली आज आफ्नै गृहजिल्ला झापामा चुनावी घरदैलो र मतदाता भेटघाटमा व्यस्त हुँदै हुनुन्छ । झापा निर्वाचन क्षेत्र नम्बर ५ का उम्मेदवार समेत रहनु भएका ओलीले आज दमक र दक्षिणी क्षेत्र गौरीगञ्जका विभिन्न टोलमा पुगेर मतदातासँग प्रत्यक्ष संवाद गर्ने तालिका रहेको छ ।
बिहान ९ः३० बजे दमक–९ स्थित चिया दोकानमा पुगेर उहाँले स्थानीय मतदातासँग चिया पिउँदै मनका कुरा सुन्ने कार्यक्रम गर्नु भएको छ । नेता र जनताबीचको दूरी मेटाउन भन्दै उहाँले चिया पसलबाटै आजको अभियान सुरु गर्न भएको छ ।
दमकको कार्यक्रम सकिएलगत्तै ओली दक्षिणी क्षेत्र गौरीगञ्ज प्रस्थान गर्नु भएको छ । एमाले झापाका जिल्ला सचिव तुलसी कार्कीका अनुसार अध्यक्ष ओली आज विशेषगरी गौरीगञ्जमा केन्द्रित हुनु हुने छ् । त्यहाँ उहाँले लगातार ७ घण्टा लगाएर १२ वटा टोलका मतदातालाई भेट्ने कार्यतालिका रहेकोछ ।
बिहान ११ बजेदेखि सुरु हुने गौरीगञ्जको भेटघाट अभियान बेलुकी ५ बजेसम्म चल्नेछ । यस क्रममा उहाँले गौरीगञ्ज–५ का शैँयया टोल, हरिरा, माथिल्लो दिनाभद्री, अल्ताबारी, दुर्गा मन्दिर र नयाँ बजारका मतदातासँग अन्तरक्रिया गर्नु हुने छ ।
गौरीगञ्ज–३ का बगुवातेलकानी, ठेकीटोला र तेलकानी टोलहरूमा पनि ओली पुग्नु हुने छ् । यस्तै, बाह्रशुद्धी, लतिझुला, भवानीपुर र हुक्कागाछीमा समेत मतदाता भेटघाट कार्यक्रम राखिएको स्रोतले जनाएको छ ।
यसअघि पनि पटक–पटक आफ्नो क्षेत्रका मतदातासँग संवाद गरिसकनु भएका ओलीले आजको भेटमा मुख्यतया स्थानीय समस्या, विकासका आवश्यकता र मतदाताका गुनासाहरू सुन्ने बताइएको छ । मतदाताका समस्यालाई नजिकबाट बुझ्ने र ती समस्या समाधानका लागि ठोस प्रतिबद्धता जनाउने ओलीको लक्ष्य रहेको सचिव कार्कीले जानकारी दिनु भयो ।
निर्वाचनको मिति नजिकिँदै गर्दा एमाले अध्यक्ष ओलीले टोल–टोलमा पुगेर मतदातालाई रिझाउन थालेपछि झापा–५ को चुनावी सरगर्मी अझै बढेको देखीएको छ ।
