विराटनगर,२० फागुन । निर्वाचन प्रचारको शिलशिलामा खोलिएका राजनीतिक दलहरुको निर्वाचन कार्यालयमा राखिएका चुनाव चिन्ह र उम्मेदवारको तस्बिरयुक्त बोर्डहरु प्रहरीले हटाउन थालेको जनाइएको छ ।
मौनअवधिमा यस्ता बोर्डहरु राख्नु आचारसंहिता विपरीत हुने भन्दै प्रहरीले कतिपय दलको कार्यालयबाट साइनबोर्डहरु हटाएको छ । तर कतिपय दलका साइनबोर्डहरु भने नहटाएको गुनासो स्थानीयले गर्न थालेका छन् ।
आज बिहान विराटनगर ६ बाट प्रहरीले केही राजनीतिक दलको कार्यालयमा राखिएको चुनाव चिन्ह अंकित बोर्डहरु हटाएको भए पनि नेपाली कांग्रेस र राष्ट्रिय स्वतन्त्र पार्टीका बोर्डहरु भने नहटाएको स्थानीयले जानकारी दिएका हुन् ।
विराटनगर ६ का दिनेश कामतले भन्नु भयो, ‘निर्वाचन आचारसंहिता दलीय आधारमा उल्लंघन हुने होइन होला, यहाँबाट प्रहरीले नेपाली कम्युनिष्ट पार्टी, नेकपा (एमाले)लगायतका कार्यालयबाट साइनबोर्ड हटाएको छ तर कांग्रेस र रास्वपाको भने छुने आँट गरेको छैन ।’
निर्वाचन आउनु २४ घण्टाभन्दा कम समय बाँकी रहेको बेलामा सम्बन्धित निकायले समानरुपमा कानुन परिपालन गराउनु पर्नेमा दलीय आधारमा भेदभाव गरेको भन्दै स्थानीय दलका कार्यकर्ताहरु आक्रोशित देखिएका हुन् ।
