मोरङ,२० फागुन। पूर्व–पश्चिम राजमार्ग अन्तर्गत मोरङको सुन्दरहरैँचा खण्डमा बुधबार अपरान्ह बमजस्तो देखिने शंकास्पद वस्तु फेला परेको प्रहरीले जनाएको छ ।
सुन्दरहरैँचा नगरपालिका–१० स्थित सडकको उत्तर साइडमा कालो टेपले बेरेको र कालो तार बाहिर निकालिएको अवस्थामा सानो डल्लो भेटिएको हो । अपरान्ह १२ः१५ बजेतिर उक्त वस्तु फेला परेको थियो ।
अहिले इलाका प्रहरी कार्यालय बेलबारीका इन्स्पेक्टर राजीव गिरी नेतृत्वको टोली पुगेर घटनास्थललाई सुरक्षित राखेको जनाइएको छ । उक्त वस्तु डिस्पोज गर्न नेपाली सेनासँग समन्वय भइरहेको प्रहरीले बताएको छ ।
उक्त वस्तु बम हो वा हैन भन्ने यकिन छैन । बिहीबारको प्रतिनिधिसभा निर्वाचनलाई प्रभावित पार्ने उद्देश्यले उक्त वस्तु राजमार्गमा राखिएको हुनसक्ने प्रहरीको अनुमान रहेको छ ।
