मोरङ,२० फागुन। पत्रकार दीपेन्द्रराज तिम्सिनाको ४५ वर्षको उमेरमा मंगलबार निधन भएको छ। एक साताअघि उच्च रक्तचापका कारण अस्वस्थ भएपछि उहाँलाई उपचारका लागि काठमाडौंस्थित मेडिसिटी अस्पताल भर्ना गरिएको थियो।
त्यहाँबाट थप उपचारका लागि काठमाडौं मेडिकल कलेज लगिएका उहाँको उपचारकै क्रममा निधन भएको पारिवारिक स्रोतले बताएको छ। मोरङको पथरीशनिश्चरे नगरपालिका–१ का स्थायी बासिन्दा तिम्सिना पत्रकारिताका साथै खोजमूलक पुस्तक लेखन र प्रकाशनमा निकै सक्रिय हुनुन्थ्यो।
उहाँले ‘टेलिफोन डायरी’, ‘नेपाल जेसिज’, ‘भुटानी शरणार्थी’, ‘तिम्सिना बन्धु’, ‘पथरी शनिश्चरे नगरपालिका’ र ‘इतिहासमा गुमनाम बिसे नगर्ची’ लगायतका महत्वपूर्ण अनुसन्धानात्मक कृतिहरू प्रकाशन गर्नु भएको छ्।
पछिल्लो समय उहाँ नेपाल बैंक तथा बैंकिङ इतिहाससम्बन्धी शोधकार्यमा व्यस्त हुनुन्थ्यो। सरल स्वभावका पत्रकार तिम्सिनाको आमा बुबा , श्रीमती , एक छोरा र छोरी रहेको बताइएको छ । पथरी जेसीजका पूर्वसदस्य उहाँ बिभिन्न संघ संस्थामा आवद्ध रहनु भएको थियो ।
