दमक, २५ | फागुन | झापाको कमल गाउँपालिका–६ गुवाबारीबाट प्रहरीले लागुऔषधसहित एक जनालाई नियन्त्रणमा लिएको छ।
आज दिउँसो करिब १ बजेतिर इलाका प्रहरी कार्यालय दमकबाट खटिएको प्रहरी टोलीले चेकजाँचका क्रममा मोटरसाइकलसहित एक जनालाई नियन्त्रणमा लिएको हो।
प्रहरीले मे ११ प ६०५० नम्बरको मोटरसाइकल रोकेर जाँच गर्दा चालक कमल गाउँपालिका–६ बस्ने ३२ वर्षीय लक्ष्मण राजवंशीको साथबाट लागुऔषध खैरो हेरोइनजस्तो देखिने पदार्थ बरामद भएको जनाएको छ।
प्रहरीका अनुसार प्लास्टिकमा पोका पारेर राखिएको उक्त पदार्थको तौल ३ ग्राम ४४० मिलिग्राम रहेको छ।
राजवंशीको साथबाट २२ हजार रुपैयाँ नगद, बजाज कम्पनीको २२० सीसी पल्सर मोटरसाइकल र रेड्मी कम्पनीको मोबाइल एक थानसमेत बरामद गरिएको प्रहरीले जनाएको छ।
लागुऔषध कारोबारमा संलग्न रहेको आशंकामा पक्राउ परेका राजवंशीलाई इलाका प्रहरी कार्यालय दमकमा राखी थप अनुसन्धान भइरहेको प्रहरीले जानकारी दिएको छ ।
तस्बिर : ए आई
