दमक ,७ चैत । झापाका विभिन्न स्थानमा आज भएका दुई फरक आगलागी तथा चट्याङ घटनामा करिब साढे पाँच लाख रुपैयाँ बराबरको क्षति भएको छ। जिल्लाको कचनकवल गाउँपालिका–४ खुट्टामुनिमा आज मध्यान्ह १२ बजेर २० मिनेटतिर एक कुखुरा फर्ममा अचानक आगलागी भएको हो। स्थानीय जमाल मियाले सञ्चालन गरेको बोइलर कुखुराको फर्ममा विद्युत तार सर्ट भई आगो लागेको प्रहरीले जनाएको छ।
आगलागीका कारण फर्ममा रहेका १४ सय वटा कुखुराका चल्ला, प्लास्टिकका दाना तथा पानी राख्ने भाँडाहरू, विद्युत वायरिङ, दाना, भुस, औषधी तथा टाटी बेरासहित करिब ३ लाख ९७ हजार रुपैयाँ बराबरको क्षति भएको छ।प्रहरी र स्थानीयबासीको सक्रियतामा करिब ४० मिनेटपछि, अर्थात् दिउँसो १ बजे आगो पूर्ण रूपमा नियन्त्रणमा लिइएको थियो। यसैबीच, झापाकै बिर्तामोड नगरपालिका–७ गरामनीमा पनि चट्याङका कारण अर्को क्षति भएको छ।
आजै मध्यान्ह १२ बजेर ४० मिनेटतिर आएको हावाहुरी र वर्षासँगै परेको चट्याङले गणेश श्रेष्ठको दुईतले पक्की घरमा जडान गरिएको विद्युत मिटर बक्स, पानी तान्ने मोटर र सम्पूर्ण वायरिङ जलेर नष्ट भएको प्रहरीले जनाएको छ। उक्त घटनामा करिब १ लाख ५० हजार रुपैयाँ बराबरको क्षति भएको छ। दुवै घटनामा मानवीय तथा चौपाया क्षति भने नभएको प्रहरीले पुष्टि गरेको छ।
एआइ तस्बीर
