दमक,८ चैत्र । दमक नगरपालिकाले अत्यन्त जरुरी सूचना जारी गर्दै बर्ड फ्लु संक्रमण फैलिन सक्ने जोखिमप्रति सबै सरोकारवालालाई सचेत गराएको छ।
नगरपालिकाका अनुसार वडा नम्बर १० मा सञ्चालनमा रहेको एक लेयर्स कुखुरा फार्मका कुखुराहरू बिरामी भई मरेपछि गरिएको परीक्षणमा संक्रामक बर्ड फ्लु रोग पुष्टि भएको हो। यो जुनोटिक प्रकृतिको रोग भएकाले पशुबाट मानवमा समेत सर्न सक्ने जोखिम रहेको जनाइएको छ। संक्रमणको फैलावट रोक्न नगर विपद् व्यवस्थापन समितिको निर्णयअनुसार प्रभावित क्षेत्रबाट कुखुरा तथा कुखुराजन्य पदार्थ—अण्डा, मासु र चल्ला—को ओसारपसार अर्को सूचना जारी नभएसम्म पूर्ण रूपमा बन्द गरिएको छ।
त्यस्तै, कुखुरा अस्वाभाविक रूपमा बिरामी परे वा अचानक मरेमा तत्काल पशुपन्छी विकास शाखामा जानकारी गराउन आग्रह गरिएको छ। कुखुरा पालक कृषकलाई फार्ममा अनावश्यक व्यक्तिको प्रवेश रोक्न र प्रवेश तथा निस्कने स्थानमा अनिवार्य रूपमा डिसइन्फेक्टेन्ट प्रयोग गर्न पनि निर्देशन दिइएको छ।
नगरपालिकाले सर्वसाधारणलाई मृत वा बिरामी कुखुरा नछुन, व्यक्तिगत सरसफाइमा विशेष ध्यान दिन र संक्रमित कुखुराको सुरक्षित व्यवस्थापन गर्न अनुरोध गरेको छ।
स्थानीय बजार तथा कुखुरा पसलहरूले सम्बन्धित निकायबाट जारी निर्देशनको पूर्ण पालना गर्नुपर्ने उल्लेख गरिएको छ भने संक्रमण नियन्त्रणमा सबै नगरवासीको सहयोग आवश्यक रहेको नगरपालिकाले जनाएको छ।
