काठमाडौं,९ चैत । सिंहदरबार भित्रका मन्त्रालयहरू अहिले नयाँ मन्त्रीको स्वागतका लागि सजिन थालेका छन्। गेटदेखि कार्यकक्षसम्म इनडोर प्लान्टका गमला राखेर परिसर हरियाली र आकर्षक बनाइएको छ। कतिपय मन्त्रालयमा कर्मचारीहरू मन्त्रीको कार्यकक्ष व्यवस्थित गर्ने काममा व्यस्त देखिन्छन्।
वसन्त ऋतुको फूलले सिंहदरबारको वातावरण पहिले नै रंगीन बनाइरहेका बेला अहिलेको सजावटले थप आकर्षण दिएको छ। कतिपय स्थानमा भने जेनजी आन्दोलनका क्रममा क्षति पुगेका संरचनाहरू पनि मर्मत र पुनः सजावट भइरहेका छन्।
निर्वाचनको अन्तिम परिणाम सार्वजनिक भइसकेको र नयाँ सरकार गठनको तयारी अघि बढिरहेको अवस्थामा मन्त्रालयहरूमा चहलपहल बढ्न थालेको हो। विभिन्न मन्त्रालयका अधिकारीहरूका अनुसार मन्त्री नहुँदा केही नीतिगत काम प्रभावित भए पनि प्रशासनिक काम भने निरन्तर चलिरहेको छ।
अब केही दिनमै नयाँ मन्त्रीहरू आउने अपेक्षासहित सिंहदरबारका कार्यालयहरू फेरि सक्रिय हुने तयारीमा छन्।
