काठमाडौं,१० चैत । बर्दियाको गुलरिया नगरपालिका–११ गणेशपुरमा स्थानीय आक्रोशपछि स्थिति तनावपूर्ण बनेर प्रहरी–प्रदर्शनकारीबीच झडप भएको छ। घटनामा करिब एक दर्जन प्रहरी घाइते भएका छन् भने ९ जनालाई नियन्त्रणमा लिइएको छ।
दुई युवकको मृत्युको घटनाले स्थानीय क्षेत्रमा आक्रोश चुलिएको हो। सुतिरहेको अवस्थामा बेहोस भएका सुरेश खटिक र बहुरोन खटिकलाई अस्पताल पुर्याइए पनि उनीहरूको ज्यान जोगिन सकेन। प्रारम्भिक रूपमा उनीहरूको मृत्यु लागुऔषध सेवनसँग सम्बन्धित भएको आशंका गरिएको छ।यसै विषयलाई लिएर स्थानीयवासीले भारतीय सीमा नाकाबाट लागुऔषध तस्करी खुलेआम भइरहेको आरोप लगाउँदै विरोध प्रदर्शन गर्दै सडक अवरुद्ध गरेका थिए। अवस्था नियन्त्रण बाहिर जाने संकेत देखिएपछि प्रहरी परिचालन गरिएको थियो।
सडक खुलाउने प्रयासका क्रममा प्रहरी र प्रदर्शनकारीबीच झडप भएको हो। तनाव बढेपछि प्रहरीले ९ राउन्ड हवाई फायर गरेको जनाइएको छ। हाल क्षेत्रको अवस्था नियन्त्रणमा रहेको र थप अनुसन्धान भइरहेको प्रहरीले जनाएको छ।
