दमक,१२ चैत।दमक नगरपालिका–१० स्थित ठूलो कुखुरा फार्ममा बर्डफ्लु पुष्टि भएपछि करोडौँ रुपैयाँ बराबरको क्षति भएको छ। घटनाले स्थानीय कुखुरापालक किसानमा त्रास र चिन्ता बढाएको छ।
दमक एग्रिकल्चर फार्मका सञ्चालक देवेन्द्र प्रशाईका अनुसार करिब २० हजार लेयर्स कुखुरा नष्ट गर्नुपरेको छ। कुखुरासँगै अण्डा, दाना चारो र फार्मका संरचनात्मक सामग्रीसमेत नष्ट भएपछि कुल क्षति तीन करोड रुपैयाँभन्दा बढी पुगेको उहाँले बताउनु भयो। फार्म बन्द भएपछि यहाँ कार्यरत १५ जना मजदुर बेरोजगार भएका छन्।
झापाकै व्यवस्थित र ठूला कुखुरा पालन केन्द्र मध्ये एक मानिएको यो फार्म आधुनिक प्रविधि र नियमित व्यवस्थापनका कारण स्थानीय बजारमा महत्वपूर्ण आपूर्ति गर्दै आएको थियो। तर एक्कासी कुखुरा मर्न थालेपछि गरिएको परीक्षणमा बर्डफ्लु पुष्टि भयो र चार दिनमै फार्म शून्य अवस्थामा पुगेको सञ्चालकको भनाइ छ।
सरकारी मापदण्ड अनुसार संक्रमण फैलिन नदिन सम्पूर्ण कुखुरा र सम्बन्धित सामग्री नष्ट गरिएको हो। हजारौँ जीवित कुखुरा मारिएका, तयार अण्डा फालिएका र चारोसमेत नष्ट भएको बताइएको छ।
बैंक ऋण र आफन्तको सहयोगमा सुरु गरिएको व्यवसाय पुनः सञ्चालन गर्न कठिन भएको सञ्चालकको गुनासो छ। बिमा भए पनि बर्डफ्लुमा दाबी नलाग्ने प्रावधानका कारण क्षतिपूर्ति पाउन समस्या भएको उहाँले बताउनु भयो।
