काठमाडौँ,१२ चैत । प्रतिनिधिसभाका नवनिर्वाचित सांसदहरूले आज दिउँसो २ बजे पद तथा गोपनीयताको शपथ लिँदै छन्। शपथअघि राष्ट्रिय प्रजातन्त्र पार्टी (राप्रपा)का सांसदहरू भने पशुपतिनाथ मन्दिर पुगेर दर्शन गरेका छन्।
राप्रपाका संसदीय दलका नेता ज्ञानेन्द्र शाहीसँगै सांसदहरू खुश्बु ओली, भरत गिरी र सरस्वती लामा बिहीबार बिहान पशुपतिनाथ पुग्नु भएको हो। दर्शनपछि सञ्चारकर्मीसँग बोल्दै शाहीले आफूहरू कुनै गलत काम नगर्ने अठोटका साथ भगवानसँग प्रार्थना गर्न आएको बताउनु भयो।उहाँले संसद मार्फत हिन्दु राष्ट्र पुनःस्थापना गर्ने लक्ष्यसहित अघि बढ्ने स्पष्ट पार्नु भयो।
यता प्रतिनिधिसभामा यसपालि ६ राजनीतिक दल र एक स्वतन्त्र सांसदको प्रतिनिधित्व रहनेछ। सांसदहरूलाई ज्येष्ठ सदस्य अर्जुन नरसिंह केसीले शपथ गराउनु हुने छ। सभामुख निर्वाचित नभएसम्म बैठक पनि उहाँले नै सञ्चालन गर्नु हुने छ्।
संसद् भवनमा भएको अघिल्लो क्षतिपछि सिंहदरबारभित्र निर्माणाधीन नयाँ संसद् भवनको बहुउद्देश्यीय हलमा शपथ र बैठकको अस्थायी व्यवस्था गरिएको संघीय संसद् सचिवालयले बताएको छ। ६३ सांसदले मातृभाषामा शपथ लिने तयारी गरिएको छ।
