काठमाडौँ,१२ चैत । नेपालमा राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाहको नेतृत्वमा नयाँ सरकार गठन गर्ने तयारी भइरहेको बेला बीबीसीले राजनीति विषयमा एउटा बहस कार्यक्रम सञ्चालन गर्ने भएको छ । ‘वल्र्ड क्वेसन्सः नेपाल’ नाम दिइएको यो बीबीसीको प्रतिष्ठित कार्यक्रम मध्येको एक हो ।
सो कार्यक्रम चैत २४ गते हुने बीबीसीले बताएको छ । नेपालमा निर्वाचन सम्पन्न भएको एक महिना पनि पुगेको छैन । निर्वाचनपछि देशको दिशा, नयाँ सरकारका प्राथमिकता, युवाको आकांक्षा र भ्रष्टाचार नियन्त्रण जस्ता गम्भीर विषयमा केन्द्रित रहने यो कार्यक्रम मण्डला थेयटरमा सञ्चालन हुने जनाइएको छ । नेपालको शीर्ष राजनीतिक नेताहरूसँग सार्वजनिक बहस सञ्चालन हुने कार्यक्रममा नयाँ सरकारको प्राथमिकता, युवापुस्ताको अपेक्षा पूरा गर्ने रणनीति, भ्रष्टाचार नियन्त्रणका प्रभावकारी उपाय तथा आर्थिक सुधारका सम्भावित मार्गहरू कार्यक्रमको एजेण्डा रहने बीबीसीले बताएको छ ।
कार्यक्रममा को को नेता सहभागी हुने भनी हालसम्म टुङ्गो लागि सकेको छैन । राजनीतिक दलका नेताहरूसँग यस विषयमा कुराकानी भइरहेको जनाइएको छ । बीबीसीका प्रस्तोता जनी डाइमण्डले कार्यक्रम सञ्चालन गर्ने जनाइएको छ । कार्यक्रममा सहभागी दर्शकहरूले प्रत्यक्ष रूपमा आफ्ना प्रश्न राख्न पाउने व्यवस्था गरिएको छ ।
कार्यक्रममा सहभागी हुनका लागि अग्रिम नै फर्म भर्नुपर्ने हुन्छ । सहभागी हुने कन्फर्म भएपछि म्यासेज वा इमेल मार्फत जानकारी गराउने जनाइएको छ । बीबीसीका अनुसार काठमाडौँ संस्करणको यो कार्यक्रम टेलिभिजन र रेडियो मार्फत विश्वभर प्रसारण गरिने जनाइएको छ ।
नेपालको बदलिँदो परिवेश र अवस्थाको बारेमा विश्वभर जानकारी पु¥याउनका लागि यो कार्यक्रम आयोजना गर्न लागिएको बीबीसीसले बताएको छ ।
