काठमाडौं,१४ चैत। नेकपा एमालेका पूर्व सभासद कर्णबहादुर मल्ललाई प्रहरीले पक्राउ गरेको छ।
मुगुको सोरु गाउँपालिका–१० घर भई हाल चन्द्रागिरी नगरपालिका–७ बस्दै आएका ५२ वर्षीय मल्ललाई शनिबार ललितपुर महानगरपालिका–१५ बाट नियन्त्रणमा लिइएको हो। ललितपुरका एसएसपी होबिन्द्र बोगटीका अनुसार एक महिलाले दिएको बलात्कार सम्बन्धी उजुरीका आधारमा पक्राउ गरिएको हो।
पीडित महिलाले फागुन ५ गते नैनेपाल प्रहरीमा उजुरी दिएकी थिइन्। उजुरीपछि जिल्ला प्रहरी परिसर ललितपुर र सातदोबाटो प्रहरी वृत्तको टोलीले मल्ललाई नियन्त्रणमा लिएको प्रहरीले जनाएको छ।
उजुरीकर्ती महिला केही समयअघि माइतीघरमा अनशनसमेत बसेकी थिइन्। घटनाबारे थप अनुसन्धान भइरहेको प्रहरीले बताएको छ।
यसैबीच, आजै गृहमन्त्री सुधन गुरुङले ललितपुर प्रहरी परिसरको अनुगमन गरेका थिए।
