काठमाडौं,१६ चैत।अब वैदेशिक रोजगारीमा जानेका लागि ठूलो राहतको खबर आएको छ। आजदेखि श्रम स्वीकृति पाउन टोकन लिनुपर्ने झन्झट अन्त्य भएको छ।
अबदेखि आवश्यक कागजात पूरा गरेर आवेदन दिएपछि सोही दिन श्रम स्वीकृति पाइने व्यवस्था लागू गरिएको छ। यसअघि दैनिक सीमित टोकन प्रणालीका कारण धेरै श्रमिकले दिनौं कुर्नुपर्ने समस्या भोग्दै आएका थिए।
श्रम, रोजगार तथा सामाजिक सुरक्षा मन्त्रालयको निर्देशनपछि वैदेशिक रोजगार विभागले नयाँ व्यवस्था लागू गरेको हो। कागजात मिलेको अवस्थामा नयाँ श्रम स्वीकृति र पुनः श्रम स्वीकृति दुवै आवेदन दिएको दिनमै उपलब्ध हुने विभागले जनाएको छ।
आइतबार मन्त्री दीपक कुमार साहको उपस्थितिमा बसेको बैठकले श्रम स्वीकृति प्रक्रियालाई छिटो, व्यवस्थित र श्रमिक मैत्री बनाउने निर्णय गरेको हो।
सरकारले श्रमिकको समय बचत, सेवा सहजता र वैदेशिक रोजगारीलाई सुरक्षित बनाउने लक्ष्यका साथ यो सुधार लागू गरेको बताएको छ। अब वैदेशिक रोजगारीका लागि प्रक्रिया झन् छिटो र सहज हुने अपेक्षा गरिएको छ।
