रौतहट,१७ चैत । यही चैत १९ गतेदेखि देशभर सञ्चालन हुन लागेको माध्यमिक शिक्षा परीक्षा (एसइई) २०८२ का लागि रौतहट जिल्लामा सम्पूर्ण तयारी अन्तिम चरणमा पुगेको छ । शिक्षा विकास तथा समन्वय इकाई रौतहटका अनुसार यस वर्ष जिल्लाभरबाट कुल १० हजार ८८ जना परीक्षार्थीहरू परीक्षामा सहभागी हुँदै छन् ।
यस पटकको परीक्षामा सहभागी हुने १० हजार ८८ विद्यार्थीमध्ये ५ हजार २७१ छात्र र ४ हजार ८१७ छात्रा रहेका छन् । समन्वय इकाई ले दिएको जानकारी अनुसार साधारण धारतर्फका साथै प्राविधिकतर्फ २४९ जना र ग्रेड वृद्धितर्फ २ सय ४५ जना विद्यार्थीले परीक्षा दिनेछन् । जिल्लाका कुल १३० वटा विद्यालयका विद्यार्थीहरू यस परीक्षामा सामेल हुनेछन्, जसमा १०२ सामुदायिक, २० संस्थागत (निजी) र ८ वटा प्राविधिक विद्यालय रहेका छन् ।
परीक्षालाई व्यवस्थित बनाउन जिल्लाभर ३९ वटा परीक्षा केन्द्रहरू निर्धारण गरिएको छ । परीक्षा सञ्चालनका लागि ३९ जना केन्द्राध्यक्ष खटाउने तयारी पूरा भइसकेको छ ।
चैत १९ गतेदेखि सुरु भई २९ गतेसम्म सञ्चालन हुने यस परीक्षालाई सफलतापूर्वक सम्पन्न गर्न शिक्षा क्षेत्रका सरोकारवाला, अभिभावक, सुरक्षाकर्मी र सञ्चारकर्मी सबैको सकारात्मक सहयोग आवश्यक रहेको समन्वय इकाई ले जनाएको छ । विद्यार्थीहरूलाई निर्धक्क भएर शान्त वातावरणमा परीक्षा दिने वातावरण सृजना गर्न जिल्ला परीक्षा समन्वय समितिले विशेष आग्रह समेत गरेको छ ।
गत वर्षको तुलनामा यस वर्ष परीक्षा प्रणालीलाई थप व्यवस्थित र प्रविधिमैत्री बनाउने प्रयास गरिएको कार्यालयको दाबी छ ।
