काठमाडौं,१९ चैत। राष्ट्रिय स्वतन्त्र पार्टीका सभापति रवि लामिछानेले दलित समुदायमाथि भएको ऐतिहासिक अन्यायप्रति सरकारको तर्फबाट सार्वजनिक रूपमा माफी माग्नु भएको छ। बिहीबार बसेको प्रतिनिधि सभा बैठकमा बोल्दै उहाँले आफ्ना मित्र खगेन्द्र सुनार निर्वाचित भएर सदनमा आएको प्रसंग उठाउँदै चुनावी दौडका क्रममा आएका विवादबारे उल्लेख गर्नु भएको छ ।
उहाँले भन्नु भयो, ‘मेरा मित्र खगेन्द्र सुनार निर्वाचित भएर यहाँ आउनु भएको छ । चुनावी दौडमा रहँदा उहाँका विषयमा विवाद आयो । थाहा छैन, उहाँले गल्ती गर्नुभयो या भएन । तर उहाँले माफी माग्नुभयो । उहाँले गल्ती गर्नुभयो कि गर्नुभएन भन्ने अन्योलबीच पनि उहाँले छिट्टै माफी माग्नुभयो ।’
लामिछानेले त्यसलाई उदाहरणका रूपमा प्रस्तुत गर्दै सिङ्गो देशलाई सम्बोधन गर्दै भन्नु भयो, ‘खगेन्द्र सुनारहरु माथि युगौंयुगसम्म गरेको अन्यायको लागि हामीले माफी माग्यौं ।’ उहाँले सदनबाट पहिलोपटक सामूहिक रूपमा ऐतिहासिक विभेदप्रति क्षमायाचना गरिएको दाबी गर्नु भयो। उहाँले भयो, ‘यो केवल सामाजिक गल्ती थिएन, संगठित अपराध थियो ।’
उहाँका अनुसार शताब्दीयौँदेखि सीप भएका समुदायलाई अछूत ठान्ने प्रवृत्तिले देशको विकासमा अवरोध सिर्जना गरेको थियो । उहाँले अब जातका आधारमा कसैले पनि झुक्न नपर्ने उल्लेख गर्दै सरकारको तर्फबाट पुनः माफी माग्नु भएको छ ।
‘यो देश किन बनेन थाहा छ । किनकी जसका हातमा सिप थियो तिनलाई हामीले अछुत मान्यौं । अब कुनैपनि नेपाली जातका नाममा झुक्नुपर्ने छैन । म सिङ्गो पार्टी, सम्माननीय प्रधानमन्त्रीज्यू र सरकारको तर्फबाट माफी माग्छु ।’
उहाँले माफीको मूल्य न्यायले निर्धारण गर्ने पनि बताउनु भयो।
