दक्षिण–पश्चिमी इरानमा खसालिएको एफ–१५ ई लडाकु विमानका दोस्रो चालक दलका सदस्यलाई पनि अमेरिकी विशेष बलले दुई दिन लामो नाटकीय खोजीपछि सफलतापूर्वक उद्धार गरेको द गार्जियनले जनाएको छ ।
राष्ट्रपति डोनाल्ड ट्रम्पले यो अभियानलाई अमेरिकी इतिहासकै सबैभन्दा साहसिक खोज तथा उद्धार कार्यमध्ये एक भनेका छन् । ती सदस्य केही घाइते भए पनि उनको अवस्था खतरामुक्त रहेको ट्रम्पले जानकारी दिएका छन् । शुक्रबार यसअघि अर्का पाइलटको उद्धार गरिएको थियो ।
उद्धारका निम्ति अमेरिकाले दर्जनौँ अत्याधुनिक हतियारसहितका विमान, पेभ हक हेलिकोप्टर र सी–१३० हर्कुलिस हवाईजहाज परिचालन गरेको थियो । यो जोखिमपूर्ण अभियानका क्रममा कुनै पनि अमेरिकी सैनिकको मृत्यु नभएको र चोटपटक नलागेको जिकिर गरिएको छ ।
अवकाशप्राप्त ब्रिगेडियर जनरल ह्युस्टन क्यान्टवेलका अनुसार, सन् २००३ को इराक आक्रमणपछि दुस्मनको प्रहारबाट अमेरिकी लडाकु विमान खसालिएको यो पहिलो घटना थियो । इरानले उक्त विमानको अवशेष र ‘इजेक्सन’ सिटको तस्बिर सार्वजनिक गर्दै पाइलट समात्नेलाई पुरस्कारको घोषणा गरेको थियो ।
पाइलटको उद्धारपछि ट्रम्पले इरानलाई कडा चेतावनी दिएका छन् । उनले इरानलाई सम्झौता गर्न वा होर्मुज जलमार्ग खोल्न अब मात्र ४८ घण्टा बाँकी भएको बताएका छन् । यसलाई समयमै पालना नगरे इरानमाथि ‘नर्क’को वर्षा गराइदिने चेतावनी ट्रम्पले दोहो¥याएका छन् ।
यसैबीच, इजरायलले शनिबार राति तेहरानका हवाई रक्षा प्रणाली र मिसाइल भण्डारण केन्द्रमा ‘भीषण’ बमबारी गरेको छ ।
युद्ध सुरु भएयता इरानमा कम्तीमा १९ सयजनाको मृत्यु र २० हजारभन्दा बढी मानिस घाइते भएका छन् । लेबनानमा इजरायली हमलामा १२ सयभन्दा बढी मानिसको ज्यान गइसकेको रेडक्रसले जनाएको छ ।
