दमक ,२३ चैत । झापाको दमकमा एक पुरुष मृत अवस्थामा फेला परेका छन्। दमक नगरपालिका–३ बेलडाँगी शिविर सेक्टर C2 हट नम्बर २०४ बस्ने ५४ वर्षीय तुल बहादुर बिष्ट मृत अवस्थामा भेटिएका हुन्।
प्रहरीका अनुसार चैत १९ गते बिहान करिब १० बजे घर नजिकै रहेको हुम्से दुम्से सामुदायिक वनमा बाख्राका लागि घाँस काट्न भन्दै घरबाट निस्किएका बिष्ट घर नफर्किएपछि आफन्त र छरछिमेकीले खोजी थालेका थिए। खोजतलासकै क्रममा चैत २३ गते बिहान करिब ९ बजे सोही वन क्षेत्रमा उनको शव फेला परेको हो।
सूचना पाएपछि इलाका प्रहरी कार्यालय दमकबाट प्रहरी नायव उपरीक्षकको कमाण्डमा पुगेको टोलीले आवश्यक कानुनी प्रक्रिया पूरा गरी दिउँसो २ बजेर १२ मिनेटमा शव पोस्टमार्टमका लागि दमक अस्पताल पठाएको प्रहरीले जनाएको छ।
प्रारम्भिक घटनास्थल अवस्था हेर्दा जंगली हात्तीको आक्रमणबाट मृत्यु भएको हुन सक्ने आशंका गरिएको छ। घटनाबारे थप अनुसन्धान जारी रहेको प्रहरीले जनाएको छ।
