हेटौँडा,२४ चैत । मकवानपुर जिल्लामा शान्ति सुरक्षा सुदृढ बनाउने उद्देश्यले प्रहरीले सञ्चालन गरेको विशेष सुरक्षा अभियान ‘अपरेसन ड्रप’ अन्तर्गत दुई दिनमै ४० भन्दा बढी व्यक्तिलाई नियन्त्रणमा लिइएको छ ।
जिल्ला प्रहरी कार्यालय मकवानपुरका प्रमुख एसपी श्यामबहादुर खत्री तथा जिल्ला प्रहरी कार्यालय मकवानपुरका प्रहरी नायब उपरीक्षक पुष्कर बोगटीको कमाण्डमा खटिएको प्रहरी टोलीले विभिन्न अवैध क्रियाकलापमा संलग्न तथा ठगी धन्दामा सक्रिय व्यक्तिहरूलाई नियन्त्रणमा लिएको हो ।
एसपी खत्रीले मकवानपुर जिल्लामा बढ्दै गएका अवाञ्छित गतिविधि, ठगी तथा सामाजिक असुरक्षालाई नियन्त्रणमा लिन अभियानलाई कडाइका साथ अघि बढाइएको जानकारी दिनु भयो । उहाँका अनुसार पक्राउ परेकामाथि आवश्यक अनुसन्धान तथा कानुनी कारबाही प्रक्रिया अगाडि बढाइएको छ ।
यस्तै, जिल्ला प्रहरी कार्यालय मकवानपुरका प्रहरी नायब उपरीक्षक पुष्कर बोगटीले ‘अपरेसन ड्रप’लाई अझ प्रभावकारी बनाउँदै जिल्लामा अपराध नियन्त्रण र शान्ति सुरक्षाको अवस्था मजबुत बनाउने लक्ष्य राखिएको बताउनु भयो । उहाँले आम नागरिकलाई ढुक्क भएर दैनिक जीवनयापन गर्न सक्ने वातावरण निर्माण गर्ने प्रतिबद्धता समेत व्यक्त गर्नु भयो ।
प्रहरीले अभियानलाई निरन्तरता दिँदै आगामी दिनमा पनि अवैध गतिविधिमा संलग्न व्यक्तिमाथि कडा निगरानी तथा कारबाही जारी रहने जनाएको छ ।
