काठमाडौँ,२४ चैत । राष्ट्रिय स्वतन्त्र पार्टी (रास्वपा) की सांसद अनुष्का श्रेष्ठले ‘जीवित आदिवासी सङ्ग्रहालय’ स्थापना गर्न सरकारसँग माग गर्नु भएको छ। मंगलबार बसेको प्रतिनिधिसभा बैठकको बोल्दै उहाँले भाषा, लिपि र परम्पराको संरक्षणका साथै पर्यटन प्रवद्र्धन गर्न यस्तो अवधारणा प्रस्ताव गर्नु भएको हो।
उहाँले प्रस्ताव गरेको सङ्ग्रहालय केवल एक भौतिक संरचना मात्र नभई आदिवासी जनजातिका भाषा बोलिने, लिपि लेखन सिकिने र परम्पराहरूको अभ्यास गरिने एक जीवन्त थलो हुने धारणा राख्नु भयो।उहाँले भन्नु भयो,‘नेपालको संविधानले आदिवासी पहिचान गर्ने अधिकार सुनिश्चीत गरेको भएतापनि यो कागजमा नै सिमित हुनुहुँदैन् । यस्तालाई जीवन्त रुपमा व्यवहारमा उतार्नु पर्छ ।
यस सन्दर्भमा ‘जीवित आदिवासी सङ्ग्रहालय’को अवधारणा प्रस्ताव गर्न चाहान्छु । यो केवल एक भौतिक संरचना मात्र नभई आदिवासी जनजातिका भाषा बोलिने, लिपि लेखन सिकिने र परम्पराहरूको अभ्यास गरिने एक जीवन्त थलोको रुपमा विचार गर्न सकिन्छ ।’ त्यस्तै उहाँले यस किसिमको सङ्ग्रहालयले नेपालको पर्यटन क्षेत्रमा दिगो आम्दानी सिर्जना गर्न र विश्वसामु नेपालको विशिष्ट ब्रान्ड निर्माणमा थप इँटा थप्ने दाबी गर्नु भयो।
