बिर्तामोड,२५ चैत । झापाको अर्जुनधारा नगरपालिका–११ बुट्टाबारीमा रहेको सिरक गोदाममा आगलागी हुँदा करिब ६० लाख रुपैयाँ बराबरको क्षति भएको छ।
आज दिउँसो करिब १२ बजे नुर मोहम्मदको सिरक गोदाममा अचानक आगलागी भएको प्रहरीले जनाएको छ। आगो नियन्त्रणका लागि इलाका प्रहरी कार्यालय अनारमनीको टोली, चारआलीस्थित अरिदमन गणको नेपाली सेना, सशस्त्र प्रहरी बल, तथा बिर्तामोड, मेचीनगर, भद्रपुर, दमक, शिवसताक्षी नगरपालिका र कमल गाउँपालिकाका दमकलसहित स्थानीयबासी खटिएका थिए।
करीब २ बजेर २५ मिनेटमा आगो पूर्ण रूपमा नियन्त्रणमा आएको प्रहरीले जनाएको छ। आगलागीबाट टिनको बार र छानो भएको गोदाम, रुवा बनाउने मेसिन तथा रुवाहरू पूर्ण रूपमा जलेर नष्ट भएका छन्।
घटनामा मानविय तथा चौपाया क्षति नभएको प्रहरीले जानकारी दिएको छ। उक्त गोदाम रौतहट घर भई बिर्तामोड–५ मा बसोबास गर्दै आएकी सलमा खातुनको नाममा रहेको र भाडामा लिइ बिर्तामोड कपास प्रशोधन उद्योग सञ्चालन हुँदै आएको बताइएको छ।
