काठमाडौँ,२८ चैत । स्वास्थ्य तथा जनसंख्या मन्त्रालयले पछिल्लो एक सातामा विभिन्न नीति, प्रशासनिक तथा सेवा सुधारसम्बन्धी गतिविधिहरूलाई अघि बढाएको छ । मन्त्रालयले यस अवधिमा अस्पताल तथा स्वास्थ्य संस्थाहरूको सेवा प्रवाह सुधार, औषधि व्यवस्थापन तथा अनुगमनलाई प्रभावकारी बनाउन सम्बन्धित निकायहरूलाई निर्देशन दिएको छ ।
साथै, स्वास्थ्य सेवाको गुणस्तर वृद्धि र सेवा प्रवाहमा देखिएका समस्या समाधानका लागि समीक्षा तथा समन्वय बैठकहरू पनि सञ्चालन गरिएको छ । त्यसैगरी, स्वास्थ्य जनशक्ति व्यवस्थापनअन्तर्गत डाक्टर, नर्स तथा अन्य स्वास्थ्यकर्मीको सरुवा, पदस्थापन तथा कार्यसम्पादन सुधार सम्बन्धी प्रशासनिक कामहरू अघि बढाइएको छ ।
मन्त्रालयले महामारी तथा मौसमी रोग नियन्त्रणका लागि आवश्यक तयारी, निगरानी र सचेतनामूलक गतिविधि विस्तारमा जोड दिएको छ । यही साता स्वास्थ्य बीमा कार्यक्रम तथा सामाजिक सुरक्षा योजनाको प्रभावकारिता बढाउने विषयमा समेत छलफल गरिएकोे छ । यसैबीच, स्वास्थ्य पूर्वाधार विकास तथा अस्पताल उपकरण व्यवस्थापन सम्बन्धी विषयमा पनि सरोकारवालासँग समन्वय तथा मूल्याङ्कन गरिएको मन्त्रालयले जनाएको छ।
यही हप्ता मन्त्रालयले स्वास्थ्य सेवालाई थप पारदर्शी, प्रविधिमैत्री र नागरिकमुखी बनाउन उच्चस्तरीय समिति गठन गरेको छ । मन्त्रालयले अतिरिक्त सचिव प्रा.डा. श्रीकृष्ण श्रेष्ठको संयोजकत्वमा ६ सदस्यीय समिति गठन गरेको हो । समितिले स्वास्थ्य सेवामा प्रविधिको प्रयोग विस्तार, सेवा प्रवाह सुधार तथा प्रणालीगत पारदर्शिता सुनिश्चित गर्ने विषयमा सुझाव तथा कार्ययोजना तयार गर्नेछ ।
साथै औषधि मूल्यवृद्धि सम्बन्धी उजुरीपछि औषधि व्यवस्था विभागका महानिर्देशक नारायण ढकाल छानबिन प्रक्रियामा तानिएका छन् । अनियमित तरिकाले औषधिको मूल्यवृद्धि गरिएको भन्दै उजुरी परेपछि प्रधानमन्त्री तथा मन्त्रिपरिषद्को कार्यालयले छानबिनका लागि स्वास्थ्य तथा जनसंख्या मन्त्रालयलाई निर्देशन दिएको हो । प्रधानमन्त्री कार्यालयले मन्त्रालयलाई पत्राचार गर्दै स्वास्थ्य सचिवमार्फत ७ दिनभित्र विस्तृत छानबिन प्रतिवेदन पेस गर्न निर्देशन दिएको छ । यसैगरी स्वास्थ्य तथा जनसंख्यामन्त्री निशा मेहताले यसै हप्ता सचेत हुनु परेको थियो ।
राष्ट्रिय स्वतन्त्र पार्टी (रास्वपा) का सभापति रवि लामिछानेले मन्त्री निशा मेहतालाई सचेत गराउन प्रधानमन्त्रीसमक्ष सिफारिस गर्नु भएको थियो। श्रममन्त्री दीपक साहले पदमा बहाल रहँदा पदीय मर्यादा दुरुपयोग गर्दै आफ्नी श्रीमतीलाई लामो समयदेखि निष्क्रिय रहेको स्वास्थ्य बीमा बोर्डको सदस्यका रूपमा नियमित कार्यमा संलग्न गराएको आरोप लागेपछि, सो विषयमा कारबाहीका लागि प्रधानमन्त्रीसमक्ष सिफारिस गरिएको थियो ।
उक्त घटनासँग जोडिएर, स्वास्थ्य मन्त्री निशा मेहताले आफ्नो जिम्मेवारी निर्वाहमा गम्भीरता नदेखाएको भन्दै सभापति लामिछानेले उहाँलाई सचेत गराउन सिफारिस गरेका थिए त्यसपछि प्रधानमन्त्रीले उहाँलाई सचेत गराइसकनु भएको छ।
