पथरी, ५ बैशाख / मोरङको पथरी शनिश्चरे–१ पथरी बजार उत्तरस्थित श्रीकृष्ण प्रणामी गोपीकृष्ण आश्रमको प्राङ्गणमा प्रस्तावित ध्यान केन्द्रको आज एक कार्यक्रमकाबीच शिलान्यास गरिएको छ ।
श्रीकृष्ण प्रणामी धर्मका जगतगुरु अनन्त विभूषित १०८ कृष्णमणिजी महाराजले विधिवत् शिलान्यास गर्दै धर्म संस्कार केवल पूजा–आराधनामा सीमित नभई समाजको साझा हितमा केन्द्रित हुनुपर्ने बताउनु भयो । विभिन्न धर्म र समुदायले आफ्ना लागि मात्र संरचना निर्माण गर्ने प्रवृत्तिभन्दा माथि उठेर स्थानीय जनमानसको विश्वास जित्ने काम नै साँचो धर्म भएको उहाँले उल्लेख गर्नुभयो । उहाँले प्रणामी मात्र नभई अन्य सम्प्रदायका मानिसहरुले समेत ध्यानमा सहभागिता जनाउने ध्यानस्थल निर्माणलाई दिगो र व्यवस्थित हिसाबले निर्माण गर्न स्थानीय समितिलाई सुझाब दिनुभयो ।
आध्यात्मिक साधना, योग र सामुदायिक गतिविधिलाई एउटै छानामुनि समेट्ने उद्देश्यसहित अघि बढाइएको यो परियोजनालाई केवल संरचना निर्माणका रूपमा नभई समाज रुपान्तरणको माध्यमका रूपमा अघि बढाइने गोपीकृष्ण आश्रमका अध्यक्ष मोहनप्रसाद अधिकारीले योजना सुनाउनु भयो ।
यस ध्यान केन्द्र निर्माणपछि पथरी क्षेत्रका बासिन्दाले योग, ध्यान तथा विभिन्न सामाजिक गतिविधि सञ्चालन गर्न सहजता पाउने विश्वास व्यक्त गरिएको छ । आश्रमका प्रमुख जगतनन्दन महाराजका अनुसार यसले स्थानीय स्तरमा आध्यात्मिक अभ्यासलाई मात्रै होइन, सामाजिक सद्भाव र सहकार्यलाई पनि मजबुत बनाउनेछ । मासु नखाइ सात्विक भोजन ग्रहण गर्ने भगवान श्रीकृष्णका अनुयायीका रुपमा यस सम्प्रदायलाई लिने गरिन्छ ।
भूल्के सिमसारको पश्चिममा निर्माणाधीन सो संरचनाको स्वरूप पनि बहुउद्देश्यीय रहने बताइएको छ । हलसहितको भवन, राजीको प्रतिमा मन्दिर, वरिपरि ६ फिट फराकिलो परिक्रमा पेटी लगायतका संरचना समेटिनेछन् । २४×४८ फिटको भवन निर्माणका लागि करिब ७४ लाख रुपैयाँ बजेट अनुमान गरिएको छ । नगरपालिकाले नक्साङ्कन कार्य सम्पन्न गरिसकेको र प्रदेश सरकार तथा सम्बन्धित वडाबाट समेत आंशिक बजेटको आश्वासन प्राप्त भएको संस्थापक अध्यक्ष डिकप्रसाद तिम्सिनाले जनाउनु भयो । ध्यान र योगका अतिरिक्त सामाजिक तथा सांस्कृतिक कार्यक्रम सञ्चालन गर्न समेत ध्यानकेन्द्र भवनले सहज वातावरण तयार गर्ने उल्लेख गर्नुभयो । यसलाई केवल धार्मिक केन्द्र नभई सामाजिक एकता, मानसिक स्वास्थ्य प्रवद्र्धन र सकारात्मक जीवनशैलीको अभ्यास गर्ने साझा स्थलका रूपमा लिने उहाँको विश्वास छ ।
ध्यान केन्द्र निर्माण अभियानले आधुनिक जीवनशैलीका बीच हराउँदै गएको आत्मिक शान्ति र सामुदायिक सहकार्यलाई पुनर्जीवित गर्ने संकेत दिएको स्थानीय सहभागिको प्रतिक्रिया छ ।
