दमक ,१३ बैशाख | लागुऔषध दुर्व्यसन तथा ओसारपसारविरुद्ध प्रहरीले सञ्चालन गरेको स्वीप अपरेशन अन्तर्गत आज १० जना नियन्त्रणमा परेका छन्।
जिल्ला प्रहरी कार्यालय झापा र मातहतका प्रहरी इकाइले आज गरेको कारबाहीमा ८ ग्राम ६६० मिलिग्राम ब्राउन सुगर र ६ वटा नाइट्रोजेपाम ट्याब्लेट बरामद भएको प्रहरीले जनाएको छ।
यस अभियान अन्तर्गत अघिल्ला दिनहरूमा पनि कारबाही जारी रहेको छ।
यस्तै शनिबार १६ जना नियन्त्रणमा लिइएका थिए। उनीहरूबाट ४ ग्राम ५०० मिलिग्राम ब्राउन सुगर र ३२ वटा नाइट्रोजेपाम ट्याब्लेट बरामद भएको थियो।
त्यसैगरी शुक्रबार ६३ जना नियन्त्रणमा परेका थिए। सो दिन १६ ग्राम ९५० मिलिग्राम ब्राउन सुगर, ११७ वटा ट्रामाडोल ट्याब्लेट र १०५ वटा डिकोलिक ट्याब्लेट बरामद गरिएको थियो।
यसअघि वैशाख १० गते बिहिवार ६२ जना नियन्त्रणमा लिइएका थिए। उनीहरूबाट २० ग्राम ४० मिलिग्राम ब्राउन सुगर र ९ हजार रुपैयाँ नगद बरामद गरिएको प्रहरीले जनाएको छ।
प्रहरीले लागुऔषध नियन्त्रणका लागि स्वीप अपरेशनलाई निरन्तरता दिइने जनाएको छ।
तस्बिर : ए आई
