जाजरकोट, १५ वैशाख । विद्यालय प्रशासनको गम्भीर लापरवाही र गैरजिम्मेवारीका कारण जाजरकोटको एक माध्यमिक विद्यालयका विद्यार्थीहरू कक्षा १२ को राष्ट्रिय परीक्षा दिनबाट वञ्चित भएका छन् । कुशे गाउँपालिका–२, टालेगाउँस्थित श्री मान्ने ढुंगा माध्यमिक विद्यालयले विद्यार्थीको आवेदन फारम र आवश्यक कागजात राष्ट्रिय परीक्षा बोर्डमा नपठाउँदा उनीहरूको भविष्य अन्योलमा परेको हो ।
प्रदेश परीक्षा व्यवस्थापन कार्यालय, सुर्खेतका अनुसार विद्यालयले सुरुमा १३६ जना विद्यार्थीको नाम अनलाइन प्रणालीमा दर्ता गरेको थियो । तर, पछि ११९ जनाको मात्र राजस्व संकलन गरी कागजात बोर्डमा पठाइएको पाइएको छ । कागजात पठाइएका विद्यार्थीको प्रवेशपत्र आएर उनीहरू परीक्षामा सामेल भइरहँदा, बाँकी विद्यार्थी भने परीक्षा हल बाहिरै बस्न बाध्य भएका छन् ।
यस प्रकरणमा अर्को उदेकलाग्दो तथ्य पनि फेला परेको छ । अघिल्लो वर्ष नै कक्षा १२ उत्तीर्ण गरिसकेका एक विद्यार्थीको समेत पुनः फारम भरेर बोर्डमा पठाइएको पाइएको छ । उक्त त्रुटि सार्वजनिक भएपछि बोर्डले ती विद्यार्थीको परीक्षा रद्द गरेको प्रदेश परीक्षा व्यवस्थापन कार्यालयका सूचना अधिकारी नरेश कुमार भट्टराईले जानकारी दिए ।
विद्यालयले विद्यार्थीले समयमै कागजात नबुझाएका कारण समस्या भएको जिकिर गर्दै बोर्डलाई पत्र पठाएको छ । यता, पीडित विद्यार्थीहरूले भने विद्यालयको दाबी झूटो भएको बताएका छन् ।
- विद्यार्थीका अनुसार आवेदन खुलेको केही दिनमै कर्मचारी घनश्याम सिंहलाई सबै कागजात बुझाइएको थियो ।
- फारम नछुटोस् भनेर प्रधानाध्यापक सुरेन्द्र बहादुर सिंहलाई पटक–पटक आग्रह गर्दा पनि बेवास्ता गरिएको उनीहरूको आरोप छ ।
- प्रति विद्यार्थी २ हजार रुपैयाँ राजस्व बुझाए पनि विद्यालयले बिल नदिएको र रकम बोर्डमा दाखिला नगरेको विद्यार्थीहरूको गुनासो छ ।
“हामीले सबै प्रक्रिया पूरा गर्दा पनि परीक्षा दिन नपाउनु सरासर अन्याय हो । हाम्रो एक वर्षको मेहनत र भविष्यमाथि विद्यालयले खेलबाड गरेको छ,” एक पीडित विद्यार्थीले आक्रोश पोखे ।
स्थानीय अभिभावक र विद्यार्थीले विद्यालय प्रशासनको यो चरम लापरवाहीलाई ‘अपराध’ को संज्ञा दिँदै दोषीमाथि कडा कारबाही गर्न माग गरेका छन् । परीक्षा जस्तो संवेदनशील विषयमा जिम्मेवार निकाय मौन बस्दा शिक्षा प्रणालीकै विश्वसनीयतामाथि प्रश्न उठेको छ ।
आजदेखि देशभर सुरु भएको कक्षा १२ को परीक्षामा ४ लाख १८ हजार ८ जना परीक्षार्थी सहभागी भइरहँदा, मान्ने ढुंगा माविका यी निर्दोष विद्यार्थी भने न्यायको पर्खाइमा छन् ।
