दमक,१५ वैशाख । दमक–२ स्थित हिमालय माध्यमिक विद्यालयको भवन निर्माणमा अनियमितता गरेको आरोपमा तत्कालीन प्रधानाध्यापक ओमप्रसाद उपाध्याय आचार्य र लेखापाल दयासागर आचार्यविरुद्ध भ्रष्टाचार मुद्दा दायर भएको छ ।
सार्वजनिक सम्पत्ति हानिनोक्सानी गरी भ्रष्टाचार गरेको आरोपमा मंगलबार विशेष अदालतमा मुद्दा दायर गरिएको अख्तियार दुरुपयोग अनुसन्धान आयोगका प्रवक्ता सुरेश न्यौपानेले जानकारी दिनु भयो ।
प्रवक्ता न्यौपानेका अनुसार प्रधानाध्यापक र लेखापालले आर्थिक वर्ष २०७७÷७८ देखि विभिन्न शीर्षकमा विद्यालयको रकम अनियमितता गरेको भन्दै आयोगमा उजुरी परेको थियो ।
अनुसन्धानका क्रममा नमूना विद्यालय भवन निर्माण गर्दा विभिन्न शीर्षकको रकम अनियमितता गरेको पाइएपछि उहाँहरूविरुद्ध मुद्दा दायर गरिएको हो ।
आयोगले उहाँहरूविरुद्ध ९३ लाख ८३ हजार ३०९ रुपैयाँ बिगो कायम गर्दै कैद र बिगो बमोजिम जरिवानाको मागदाबी गरेको हो ।
