सुर्खेत ,१९ वैशाख। सल्यानमा नयाँ भवनका लागि जग खन्ने क्रममा ठूलो परिमाणमा द्वन्द्वकालीन बम र विस्फोटक पदार्थ फेला परेको छ। शारदा नगरपालिका–३ स्थित जिल्ला प्रहरी कार्यालयकै परिसरभित्र जग खन्ने क्रममा यी घातक वस्तु भेटिएका हुन्।प्रहरीका अनुसार उत्खननका क्रममा हालसम्म ८६ वटा बम फेला परेका छन्। जसमा ८२ वटा सकेट बम, ३ वटा सुतली बम र एउटा बोतल बम रहेका छन्। बुधबार दिउँसो पहिलो पटक शंकास्पद वस्तु देखिएपछि उत्खनन सुरु गरिएको थियो, जहाँ शनिबार पुनः थप बम र विष्फोटक सामग्री फेला परेका हुन्।
बमका साथै घटनास्थलबाट ७ थान वाकीटाकी, ५०० ग्राम तयारी विस्फोटक पदार्थ, बम बनाउन प्रयोग हुने २ केजी पार्टपूर्जा र १० मिटर फायरिङ केबल समेत बरामद गरिएको सल्यान प्रहरी प्रमुख हेमबहादुर केसीले जानकारी दिनुभयो। अहिले यी बमहरू निष्क्रिय पार्न नेपाली सेनाको टोली परिचालन गरिएको छ। कालिभक्ति गण भैरहवा र सिद्धीबक्स गण सल्यानका प्राविधिक टोलीले बम डिस्पोजलको काम गरिरहेका छन्। ठूलो परिमाणमा विस्फोटक पदार्थ भेटिएपछि दाङबाट समेत विशेष सैन्य टोली बोलाइएको छ।
