काठमाडौँ,१९ वैशाख । हराएको दशकौँ पछि, अन्ततः भगवान बुद्धको एउटा प्राचीन मूर्ति आफ्नै थातथलोमा फर्किएको छ। काठमाडौँ महानगरपालिका–२३, ओम बहालस्थित न्छुे बहा (बज्रधातु विहार) बाट चोरी भएको यो ऐतिहासिक बुद्ध मूर्तिलाई शुक्रबार बुद्ध जयन्तीको पावन अवसर पारेर पुनः प्रतिस्थापन गरिएको छ।
यो मूर्ति चोरी भएर अमेरिकाको न्यूयोर्कस्थित टिबेट हाउस कलेक्सन पुगेको थियो। नेपाल सम्पदा अभियानीहरू र पुरातत्व विभागको अथक प्रयासपछि २०७८ साल फागुन १८ गते नै यसलाई नेपाल फिर्ता ल्याइएको थियो। केही समय राष्ट्रिय संग्रहालयमा सुरक्षित राखिएको यो मूर्तिलाई अहिले स्थानीयको माग र महानगरको पहलमा विहारमै फर्काइएको हो।
काठमाडौँ महानगरकी कार्यवाहक प्रमुख सुनिता डंगोलको विशेष सक्रियतामा प्राचीन स्मारक संरक्षण ऐन बमोजिम गुठियारहरूलाई सुरक्षाको जिम्मेवारी दिँदै यो मूर्ति हस्तान्तरण गरिएको हो। हनुमानढोकाबाट बाजागाजासहित नगर परिक्रमा गराई बुद्धको मूर्तिलाई पुनः न्छुे बहाको मूल आसनमा राखिएको छ।
आफ्नो हराएको सम्पदा घर फर्कँदा स्थानीय हर्षविभोर भएका छन्। यो पुनरागमनले नेपालका अन्य चोरी भएका कलाकृतिहरू फिर्ता ल्याउने अभियानमा थप उत्साह थपेको छ।
