काठमाडौँ,२० वैशाख। सरकारले उपत्यकाका विभिन्न सुकुम्वासी बस्ती खाली गराएसँगै भत्काइएका संरचनाका अवशेषहरू संकलन गर्नेहरूको भीड बढेको छ। गत शनिबारदेखि थापाथली, गैरीगाउँ, शंखमूल, मनोहरा, बालाजु, बल्खु, टेकु र धोबीखोला किनारका बस्तीहरू हटाउन सुरु गरिएको हो। अहिले यी क्षेत्रहरूमा भग्नावशेषबाट छड, इँटा र अन्य कवाडी सामग्री निकाल्नेहरूको बाक्लो उपस्थिति देखिन्छ। बस्ती खाली गरिएका स्थानहरूमा कवाडी संकलन गर्नेहरूले शुल्क बुझाएरै सामान निकाल्ने गरेका छन्।
रौतहटका लालु रजकका अनुसार शंखमूल क्षेत्रमा दुईवटा घरको छड निकाल्न प्रतिघर ३५ हजार रुपैयाँ तिरेका छन्। शुक्रबार मात्रै शंखमूलमा १०७ वटा घर भत्काइएको थियो। इँटा संकलन गर्ने कार्यमा विशेषगरी महिलाहरूको ठुलो संख्या खटिएको छ। उनीहरू भत्किएका पर्खालबाट इँटा छुट्ट्याउने र सफा गर्ने काममा व्यस्त छन्।
साइकलमा कवाडी संकलन गर्नेहरू पनि यतिबेला भत्काइएका सुकुम्वासी क्षेत्रलाई नै मुख्य केन्द्र बनाएर सामान जुटाइरहेका छन्। भत्काइएका संरचनाबाट निस्कने फलाम र इँटाको पुनः प्रयोग हुन सक्ने भएपछि सुकुम्वासी बस्तीहरू यतिबेला कवाडी संकलकहरूको ’हब’ जस्तै बनेका छन्।
