दमक, २१ बैशाख | मोरङ क्षेत्र नम्बर ३ का प्रतिनिधि सभा सदस्य गणेश कार्की ले जिल्लाको भूमि समस्या सामान्य नभएको भन्दै विशेष ढंगले समाधान गर्न सरकारलाई आग्रह गर्नुभएको छ।
उहाँले मोरङ ३ लाई फरक दृष्टिले हेरेर दीर्घकालीन समाधान खोज्नुपर्ने बताउनुभयो।
मोरङ जिल्ला मा सुकुम्बासी, अव्यवस्थित बसोबासी र दोहोरो स्वामित्वका समस्या गम्भीर बन्दै गएको उल्लेख गर्दै कार्कीले सरकारले पर्याप्त सूचना सार्वजनिक नगर्दा वास्तविक पीडित झन् अन्योलमा परेको बताउनुभयो।
उहाँले पीडित नागरिकलाई धैर्य गर्न आग्रह गर्दै सरकारको पछिल्लो धारणा मनन् गर्न अनुरोध गर्नुभएको छ।
प्रधानमन्त्रीको प्रस्टोक्ती
यता, प्रधानमन्त्री बालेन्द्र शाह ले सरकारी जग्गा तथा नदीकिनार क्षेत्रमा भएको अतिक्रमण व्यवस्थापनका विषयमा फैलिएका भ्रमप्रति सरकार गम्भीर रहेको बताउनुभएको छ।
सरकारले नागरिकलाई उठिबास गराउने उद्देश्य नभएको स्पष्ट पार्दै भूमिसम्बन्धी ऐनका केही कानुनी अवरोध अध्यादेशमार्फत हटाइएको जानकारी दिनुभएको छ।
सरकारका अनुसार अब वास्तविक भूमिहीनको डिजिटल लगत संकलन, विवरण प्रमाणीकरण र अभिलेख तयार गर्ने काम सुरु भइसकेको छ। असुरक्षित स्थानमा बसोबास गरिरहेका नागरिकलाई सुरक्षित स्थानमा व्यवस्थित स्थानान्तरण गरिने र अन्य भूमिहीनका हकमा आयोगको सिफारिसका आधारमा निर्णय हुने जनाइएको छ।
सरकारले कुनै पनि नागरिक घरबारविहीन हुने अवस्था आउन नदिने प्रतिबद्धता दोहोर्याउँदै अपुष्ट सूचना नफैलाउन र अनावश्यक त्रासमा नपर्न नागरिकलाई आग्रह गरेको छ।
