पोखरा,२१ वैशाख । पोखरा महानगरपालिकाका मेयर धनराज आचार्यले सुकुमबासी समस्या समाधानका लागि महानगरपालिका गम्भीर र जिम्मेवार ढङ्गले लागिरहेको भन्दै आन्दोलन छोडेर सहयोग गर्न आग्रह गर्नु भएको छ। विना विकल्प राज्यले हटाउन लागेको भन्दै सुकुमबासीहरूले सङ्घर्षका कार्यक्रम घोषणा गरेका छन् । आचार्यले सुकुमबासी बस्तीलाई मानव ढालको रूपमा प्रयोग नगर्न र अनावश्यक उत्तेजनामा नआउन अपिल गर्नु भएको छ। सुकुमबासी समस्या समाधानको पहिलो चरणको रूपमा पोखराले निस्सा वितरण गरिसकेको छ । ’बसोबासका लागि अस्थायी प्रमाण (निस्सा) वितरण गर्ने सम्भवतः पोखरा पहिलो हो, उहाँले भन्नु भयो, ’निस्सा प्राप्त गर्नुभएका नागरिकहरूको यथार्थ छानबिन गर्ने कार्य भइरहेको छ ।
निस्सा प्राप्त गरेकाहरूको हकमा दुईवटा विकल्पबाट व्यवस्थापन गर्ने महानगरले जनाएको छ । हाल बसोबास गरिरहेको ठाउँ जोखिमरहित भएको र सरकारी परियोजनाका लागि आवश्यक नपर्ने देखिएमा सोही स्थानमा व्यवस्थापन गर्ने र बसोबास गरेको ठाउँ जोखिमपूर्ण वा सार्वजनिक आयोजनाका लागि आवश्यक भएमा नियमानुसार वैकल्पिक स्थानमा व्यवस्थापन गर्ने मेयर आचार्यले सुनाउनु भयो ।
पछिल्लो समय अतिक्रमित क्षेत्र खाली गराउने महानगरको सूचनापछि समस्या गिजोल्ने प्रयास भइरहेको उहाँको आरोप छ । ’प्रिय दाजुभाइ तथा दिदीबहिनीहरू, तपाईंहरूले आन्दोलन गर्न आवश्यक छैन । महानगर तपाईंहरूको समस्या समाधानका लागि जिम्मेवार छ,।
उहाँले सुकुमबासीहरूलाई आफ्ना माग र सुझावहरू राख्नका लागि सङ्घर्ष समिति गठन गर्नुको सट्टा सहयोग तथा सहजीकरण समिति गठन गर्न भन्नु भयो । महानगरले कानुनसम्मत ढङ्गले वास्तविक सुकुमबासीको पहिचान र व्यवस्थापन गर्ने कार्यमा सहयोग गर्न सबै सरोकारवाला पक्षलाई आह्वान गरेको छ । पोखराका सुकुमबासीले आज प्रधानमन्त्री र मेयरलाई ज्ञापनपत्र बुझाउने तयारी गरि रहेका छन् ।
