पोखरा,२१ वैशाख । बालबालिकाहरूलाई ललाईफकाई गरी कानको मुन्द्रा चोरी गर्ने महिलालाई जिल्ला प्रहरी कार्यालय कास्कीले पक्राउ गरेको छ ।
पक्राउ पर्नेमा स्याङ्जा चापाकोट नगरपालिका वडा नं ३ घर भएकी र हाल पोखरा वडा नं १० रामबजार बस्दै आएकी २५ वर्षीया अम्बिका पुलामी मगर रहेकी छिन् ।
उनलाई गत वैशाख ६ गते पोखरा महानगरपालिका वडा नं २५ हेम्जा रामचोकमा बस्ने अन्दाजी छ वर्षीया बालिकाको मुद्रा चोरी गरेको आरोप लागेको थियो। बालिकालाई अपरिचित अम्बिकाले तिम्रो ममीको साथी हुँ भनी फकाउने गरेको जिल्ला प्रहरी कार्यालय कास्कीले जनाएको छ ।
उनले विभिन्न प्रलोभन देखाएर बालिकालाई एकान्तमा पुर्याएर कानमा लगाएको करिब एक लाख रुपैयाँ बराबरको सुनको मुन्द्रा लुटेर फरार भएकी थिइन् ।
बालिकाका आफन्तको जाहेरी पछि प्रहरीले घटनास्थल वरपरको फुटेजको अध्ययन गरेको थियो भने फुटेजमा पहेँलो रङको रेनकोट लगाएकी महिलाले ग२५प ३५८४ नम्बरको स्कुटरमा बालिकालाई लिएर गएको देखिएको थियो ।
अनुसन्धान गर्ने क्रममा उक्त स्कुटर पनि भाडामा लिइएको खुलेको छ । प्रहरीले खोजतलास तीव्र पारेको थियो । अन्ततः वैशाख १७ गते पोखरा वडा नं ९ महेन्द्रपुलबाट अम्बिकालाई प्रहरीले नियन्त्रणमा लिन सफल भयो ।
प्रहरीले चेक गर्दा पक्राउ परेकी अम्बिका पुलामी मगर पुरानो पटके अपराधी भएको खुलेको छ ।
उनी विरुद्ध यसअघि नै कास्की जिल्ला अदालतबाट चोरी तथा डाँकासम्बन्धी १८ ओटा फरक फरक मुद्दामा कैद र जरिवानाको फैसला भइसकेको देखिएको प्रहरीले जनाएको छ ।
उनीबिरुद्ध ०७९ असार ८ मा १० ओटा मुद्दामा जनही दुई वर्ष कैद र २० हजार जरिवाना, २०७९ असार २२ गते अन्य आठ ओटा मुद्दामा छ महिनादेखि एक वर्ष छ महिनासम्मको कैद सजाय भएको अदालतको अभिलेखमा देखिएको छ ।
हाल उनलाई चोरी तथा डाँकासम्बन्धी कसूरमा कास्की जिल्ला अदालतबाट सात दिनको म्याद थप गरी हिरासतमा राखिएको र उनीमाथि थप अनुसन्धान भइरहेको जिल्ला प्रहरी कार्यालय कास्कीले जनाएको छ ।
