काठमान्डौं ,२१ वैशाख । राष्ट्रपति रामचन्द्र पौडेलले पुनर्विचारका लागि फिर्ता पठाएको संवैधानिक परिषद्सम्बन्धी अध्यादेशलाई सरकारले पुनः अघि बढाएको छ। आइतबार बसेको मन्त्रिपरिषद् बैठकले उक्त अध्यादेश जस्ताको त्यस्तै रूपमा फेरि जारी गर्न सिफारिस गर्ने निर्णय गरेको हो।
सरकारका प्रवक्ता तथा शिक्षा, विज्ञान तथा प्रविधि एवं युवा तथा खेलकुदमन्त्री सस्मित पोखरेलले बैठकले अध्यादेश पुनः राष्ट्रपतिसमक्ष पठाउने निर्णय गरेको जानकारी दिए। उनका अनुसार राष्ट्रपति कार्यालयबाट फर्काइएको सो अध्यादेशमा कुनै परिवर्तन नगरी पुनः सिफारिस गरिएको हो।
राष्ट्रपति पौडेलले आइतबार उक्त अध्यादेश सरकारलाई फिर्ता पठाएका थिए। तर २४ घण्टा नबित्दै सरकारले सोही अध्यादेश पुनः राष्ट्रपति कार्यालयमा पठाएको छ।
