झापा,२१ वैशाख । सीमा सुरक्षा र राजस्व संकलनका लागि स्थापना गरिएका भन्सार कार्यालयहरू नै बेवारिसे बने भने के होला? कोशी प्रदेशको प्रमुख नाका मेची भन्सार अन्तर्गतका छोटी भन्सारहरूको अवस्था अहिले यस्तै छ।
मेची भन्सार कार्यालय मातहतमा रहेका ६ वटा छोटी भन्सार मध्ये अहिले ५ वटा पूर्ण रूपमा बन्द छन्। गौरीगञ्जको आठमौजा छोटी भन्सार त सञ्चालनमा छ, तर त्यहाँ पनि कारोबार शून्य जस्तै छ।
गाडागल्ली, बाहुनडाँगी, नकलबन्दा, सतिघट्टा र महाभारा जस्ता रणनीतिक नाकाहरूमा रहेका भन्सार कार्यालयहरू अहिले नाम मात्रका छन्। भन्सार नचल्नुको मुख्य कारण— त्यहाँ न क्वारेन्टाइनको सुविधा छ, न त व्यापारिक चहलपहल नै। मेची भन्सारका सूचना अधिकारी ईश्वरकुमार हुमागाईँका अनुसार, व्यापार नहुँदा यी नाकाहरू सुस्ताएका हुन्।
तर, स्थानीय बासिन्दा र जनप्रतिनिधिको गुनासो भने फरक छ। मेचीनगर–४ का वडाध्यक्ष अर्जुनकुमार कार्की भन्नुहुन्छः
“१९९० सालदेखि चलेको बाहुनडाँगी जस्तो ऐतिहासिक नाका ८ वर्षदेखि बन्द हुनु दुःखद छ। हामी जनस्तरबाट सहयोग गर्न तयार छौँ, तर सरकारले यो पुरानो विरासत जोगाउन चासो देखाएन।“
हुन पनि, राणाकाल र पञ्चायतकालमा समेत इलाम र झापाका मानिसहरू कोलकाता सम्म पुग्ने यो मुख्य मार्ग अहिले झाडीले भरिएको छ। कतिपय ठाउँमा भन्सारका भवनहरू जीर्ण भइसकेका छन् भने कतै सशस्त्र प्रहरीले सुरक्षा दिएर ती भवन जोगाइरहेका छन्।
काँकडभिट्टामा प्रविधियुक्त सुख्खा बन्दरगाह बनिरहँदा, गाउँका यी छोटी भन्सारहरू भने इतिहासको पानामा मात्र सीमित हुने डर बढेको छ। के सरकारले यी नाकाहरूलाई फेरि सञ्चालनमा ल्याँउला? कि यी सरकारी भवनहरू यसरी नै खण्डहर बनिरहनेछन?
