सुनसरी,२२ वैशाख। सुनसरीको सुन्दरहरैँचा नगरपालिका–७ सलकपुरमा ट्रकसँग ठोक्किँदा मोटरसाइकल दुर्घटना भएको छ। दुर्घटनामा एक युवकको मृत्यु भएको छ भने दुई जना घाइते भएका छन्।
प्रहरीका अनुसार पूर्व–पश्चिम राजमार्गमा प्रदेश १–०१–००१ ख ४२०३ नम्बरको ट्रकलाई को १९ प ८१२८ नम्बरको मोटरसाइकलले ओभरटेक गर्ने क्रममा बिहान ११स्४० बजेतिर दुर्घटना भएको हो।
मोरङ ट्राफिक प्रहरी प्रमुखका अनुसार ओभरटेक गर्ने क्रममा मोटरसाइकल ट्रकसँग ठोक्किँदा मोटरसाइकल चालक धनकुटाको छथर जोरपाटी गाउँपालिका–१ का २० वर्षीय अनिश बुढाथोकीको मृत्यु भएको हो। गम्भीर घाइते भएका बुढाथोकीलाई उपचारका लागि विराटनगरस्थित कोशी अस्पताल लगिएकोमा चिकित्सकले मृत घोषणा गरेका थिए।
दुर्घटनामा मोटरसाइकलको पछाडि सवार सुन्दरहरैँचा–७ का १९ वर्षीय आशिष विक र १८ वर्षीय हरिबहादुर विक घाइते भएका छन्। उनीहरूको विराटनगरस्थित नोबेल शिक्षण अस्पतालमा उपचार भइरहेको प्रहरीले जनाएको छ।
दुर्घटनालगत्तै प्रहरीले ट्रक र चालक सुनसरीको दुहबी नगरपालिका–८ का २३ वर्षीय रोशन खड्कालाई नियन्त्रणमा लिएर घटनाको अनुसन्धान सुरु गरेको छ। ट्राफिक नियम उल्लंघन गर्दै तीव्र गतिमा र जथाभावी ओभरटेक गर्दा दुर्घटना भएको प्रारम्भिक अनुसन्धानबाट खुलेको छ।
