काठमान्डौं,२३ वैशाख । काठमाडौँको कीर्तिपुर नगरपालिका–१० बोडेटोलमा आज दिउँसो एक युवकको धारिलो हतियार प्रहार गरी हत्या गरिएको छ।
जिल्ला प्रहरी परिसर काठमाडौँका प्रवक्ता एवं प्रहरी उपरीक्षक पवनकुमार भट्टराईका अनुसार गुल्मीको धुर्कोट गाउँपालिकाका विपिन घिमिरेमाथि आक्रमण भएको थियो। गम्भीर घाइते भएका उनलाई उपचारका लागि लगिए पनि ज्यान जोगाउन सकिएन।
प्रहरीका अनुसार घटनामा संलग्न व्यक्तिको पहिचान भइसकेको छ र पक्राउका लागि खोजी तीव्र पारिएको छ। प्रारम्भिक अनुसन्धानले साथी–साथीबीचको विवादका क्रममा झगडा बढ्दै जाँदा धारिलो हतियार प्रयोग भएको देखाएको छ।
घटनाबारे थप अनुसन्धान भइरहेको प्रहरीले जनाएको छ।
