झापा ,२३ वैशाख । बिर्तामोडका सुकुम्बासीहरूले “डोजर आतंक” बन्द गर्न माग गर्दै बुधबारदेखि विरोध प्रदर्शन सुरु गरेका छन्। उनीहरूले वर्षौंदेखि बसोबास गर्दै आएको स्थानबाट विस्थापित नगर्न र धनीपुर्जा उपलब्ध गराउनुपर्ने माग राखेका छन्।
आन्दोलनरत सुकुम्बासीहरूले देशभर नै डोजर चलाएर बस्ती हटाउने कार्य बढेको भन्दै नागरिकको आवासको हकमाथि खेलवाड नगर्न चेतावनी दिएका छन्। बिर्तामोड नगरपालिकामा ज्ञापनपत्र बुझाउँदै भूमिहीन सुकुम्बासी संयुक्त संघर्ष समितिले नगरपालिका क्षेत्रभित्रका घर–टहरा भत्काउने कार्य तत्काल रोक्न, वास्तविक सुकुम्बासीलाई जग्गाधनी प्रमाणपूर्जा उपलब्ध गराउन तथा भू–माफियामाथि कारबाही गर्न माग गरेको छ।
साथै, डोजर प्रयोगका क्रममा ज्यान गुमाएकाहरूलाई शहिद घोषणा गरी परिवारलाई उचित क्षतिपूर्ति दिनुपर्ने माग पनि अघि सारिएको छ। बिर्तामोड नगरपालिकाकी प्रमुख पवित्रा देवी महतारा प्रसाईंलाई बुझाइएको ज्ञापनपत्रमा सरकारले सञ्चालन गरेको डोजर अभियानले भूमिहीन सुकुम्बासीहरूको मौलिक हक कुण्ठित गरेको उल्लेख गरिएको छ।
नेपालको संविधान २०७२ को धारा ३७ ले प्रत्येक नागरिकलाई उपयुक्त आवासको हक सुनिश्चित गरेको छ। साथै, सर्वोच्च अदालतले वैकल्पिक व्यवस्था नगरी बस्ती हटाउन नपाइने निर्देशन दिएको सन्दर्भमा सुकुम्बासी बस्तीमा डोजर चलाउनु अमानवीय भएको संघर्ष समितिको भनाइ रहेके छ।
