काठमाडौं,२४ वैशाख । नेपाल सरकारको तर्फबाट विभिन्न सरकारी बैंकहरूमा प्रतिनिधित्व गरिरहेका अध्यक्ष तथा सञ्चालकहरूले सामूहिक रूपमा पदबाट राजीनामा दिएका छन्। सरकारलाई नयाँ नियुक्ति र कार्यसम्पादनमा सहज होस् भन्ने उद्देश्यले राष्ट्रिय वाणिज्य बैंक र कृषि विकास बैंकका सञ्चालकहरूले बुधबार राजीनामा बुझाएका हुन्।
राष्ट्रिय वाणिज्य बैंक र कृषि विकास बैंकमा रिक्तता
राष्ट्रिय वाणिज्य बैंकका सञ्चालक देवकुमार ढकालले बुधबार नै आफ्नो राजीनामापत्र बुझाएको पुष्टि गर्नु भएको छ। सरकारलाई सहयोग पु¥याउने हेतुले आफूसहित अन्य सञ्चालकहरूले पनि राजीनामा दिएको उहाँले जानकारी दिनु भयो।
यस्तै, कृषि विकास बैंकका अध्यक्ष डिम प्रसाद पौडेल र अर्थ मन्त्रालयको तर्फबाट प्रतिनिधित्व गर्ने अन्य सञ्चालकहरूले पनि राजीनामा दिनु भएको छ्। बैंकका कम्पनी सचिव हिमलाल पौडेलका अनुसार अर्थ मन्त्रालयको तर्फबाट सञ्चालक समितिमा रहेका सदस्यहरूले बुधबार नै पद त्याग गर्नु भएको छ्।
अर्थ मन्त्रालयको ’ग्रिन सिग्नल’ र राजीनामाको कारण
यसअघि सरकारले अध्यादेशमार्फत १५९४ जनालाई पदमुक्त गरे पनि नेपाल राष्ट्र बैंक र बैंक तथा वित्तीय संस्थाहरूको हकमा उक्त निर्णय आकर्षित भएको थिएन। तर, अर्थ मन्त्रालयले बैंकका पदाधिकारीहरूलाई राजीनामा दिएर मार्गप्रशस्त गर्न सन्देश पठाएपछि उनीहरूले पद छाडेका हुन्।
नेपाल बैंकका सञ्चालकहरूको प्रतिवद्धता
नेपाल बैंक लिमिटेडका सरकारी सञ्चालकहरूले हालसम्म औपचारिक रूपमा राजीनामा नबुझाए पनि उनीहरूले छिट्टै पद छाड्ने प्रतिवद्धता जनाइसकेका छन्। सम्भवतः केही दिनभित्रै त्यहाँ पनि नयाँ नियुक्तिको प्रक्रिया सुरु हुनेछ।
कुन सञ्चालक पदमै रहन्छन्?
राजीनामा सरकारी कोटाबाट नियुक्त भएका सञ्चालकहरूले मात्र दिएका हुन्। साधारण सेयर जारी गरेका यी बैंकहरूमा सर्वसाधारण सेयरधनीको तर्फबाट निर्वाचित भएका सञ्चालक र स्वतन्त्र सञ्चालकहरू भने यथावत रहनेछन्।
