काठमाडौँ,२६ वैशाख । अर्थमन्त्री डा. स्वर्णिम वाग्लेले निजी क्षेत्रका उद्योगी व्यवसायीलाई धरपकड गरिँदै छ भन्ने हल्ला निराधार रहेको स्पष्ट पार्नुभएको छ। शुक्रबार साँझ काठमाडौँमा आयोजित एक कार्यक्रममा बोल्दै उहाँले सरकार व्यवसायीहरूलाई त्रसित बनाउने पक्षमा नरहेको बताउनुभयो। व्यवसायीहरू माझ विश्वस्त पार्दै अर्थमन्त्री वाग्लेले भन्नुभयो, “निजी क्षेत्रका व्यवसायीलाई थुन्ने वा धरपकड गर्ने कुनै सूची सरकारले बनाएको छैन। तपाईँहरू हल्लाको पछि नलाग्नुहोस्, तपाईँहरू हाम्रो विकासका साझेदार हुनुहुन्छ।”
अर्थमन्त्री वाग्लेले नेपालको अर्थतन्त्रलाई १०० बिलियन डलर (१ खर्ब डलर) को आकारमा पु¥याउने सरकारको महत्वाकांक्षी योजनामा निजी क्षेत्रको भूमिका अपरिहार्य रहेको उल्लेख गर्नुभयो। उहाँले सरकारले तय गरेका पाँच मुख्य प्राथमिकताहरू यसरी प्रस्ट्याउनुभयोः
राज्यका हरेक संयन्त्रमा पारदर्शिता र विधिको शासन कायम गर्ने।
शिथिल बनेको अर्थतन्त्रलाई चलायमान बनाउने।
मुलुकको आन्तरिक र बाह्य (छिमेकी मुलुकहरूसँग) सञ्जाल विस्तार गर्ने।
शिक्षा, स्वास्थ्य र मानव संशाधनमा लगानी बढाउने।
पर्यटन, संस्कृति र इतिहासको प्रवद्र्धनमार्फत विश्वमञ्चमा नेपालको उपस्थिति मजबुत बनाउने।
भारतको आर्थिक विकासको उदाहरणः ’आगामी बजेट निर्णायक हुने’
अर्थतन्त्रको दिशा परिवर्तन गर्न (जहाज मोड्न) सरकार लागिपरेको भन्दै उहाँले व्यवसायीहरूलाई आगामी बजेटसम्म धैर्य गर्न आग्रह गर्नुभयो। सन् २०१४ मा भारतीय प्रधानमन्त्री नरेन्द्र मोदीले सत्ता सम्हाल्दाको भारतको आर्थिक अवस्था र अहिलेको नेपालको सूचकहरू मिल्दोजुल्दो रहेको भन्दै उहाँले नेपालले पनि अब आर्थिक फड्को मार्ने बेला आएको बताउनुभयो।
“सन् २०१४÷१५ मा भारतको केही आर्थिक सूचकहरू नेपालको अहिलेकै हाराहारीमा थिए। तर पछिल्लो १२ वर्षमा भारतले ठुलो प्रगति गरेको छ। राजनीतिक स्थायित्व र इमानदारीका साथ काम गरे हामी पनि सोही बाटोमा अघि बढ्न सक्छौँ,“ उहाँले भन्नुभयो।
