सुनसरी, २६ वैशाख । सुनसरीको धरानस्थित एक होटलबाट प्रहरीले प्रतिबन्धित लागुऔषध ब्राउन सुगरसहित तीन जनालाई पक्राउ गरेको छ। इलाका प्रहरी कार्यालय धरान, वडा प्रहरी कार्यालय धरान र कोशी प्रदेश प्रहरी कार्यालय विराटनगर (आरआईटी) बाट खटिएको संयुक्त टोलीले उनीहरूलाई शुक्रबार राति पक्राउ गरेको हो।
पक्राउ पर्नेहरूमाः सन्देश तामाङ (२० वर्ष): मेलम्ची नगरपालिका–४, सिन्धुपाल्चोक (हालः गोकर्णेश्वर–६, काठमाडौँ)
समिर दियाली (२२ वर्ष): काभ्रेपलान्चोक नगरपालिका–३, काभ्रे (हालः कागेश्वरी मनोहरा–६, काठमाडौँ)
क्षितिज भण्डारी (२८ वर्ष): बिर्तामोड नगरपालिका–६, झापा
प्रहरीका अनुसार धरान उपमहानगरपालिका–९, बगैँचालाइन स्थित रत्न इन होटलको कोठा नम्बर ७ मा लागुऔषधको कारोबार भइरहेको विशेष सूचनाका आधारमा छापा मारिएको थियो। खानतलासीका क्रममा उनीहरूको साथबाट ३६ ग्राम ९१० मिलिग्राम ब्राउन सुगर फेला परेको छ। पक्राउ परेका व्यक्तिहरूले लागुऔषध ओसारपसार र कारोबारमा प्रयोग गरेका दुईवटा मोटरसाइकल पनि प्रहरीले बरामद गरेको छ। बरामद गरिएका सवारी साधनहरूमाः
१. बागमती प्रदेश ०२–०२७ प ३२८१
२. बागमती प्रदेश ०२–०४३ प ४८८२ रहेका छन्।
पक्राउ परेका तीनै जनालाई नियन्त्रणमा लिएर लागुऔषध नियन्त्रण ऐन अन्तर्गत थप अनुसन्धान र कानुनी प्रक्रिया अगाडि बढाइएको प्रहरीले जनाएको छ।
