दमक,२६ वैशाख । दमकमा सामाजिक संस्था पहिलो पाइला नेपाल, दमक शाखाको पाँचौँ शाखा अधिवेशन तथा पद हस्तान्तरण कार्यक्रम सम्पन्न भएको छ। अधिवेशनले दोस्रो कार्यकालका लागि राजु निरौला (गोविन्द) लाई पुनः अध्यक्षमा चयन गरेको छ।
नवगठित कार्यसमितिको उपाध्यक्षमा नवराज खड्का, सचिवमा पूजा दाहाल र कोषाध्यक्षमा विनोद अधिकारी चयन भएका छन्। यस्तै कार्यसमिति सदस्यहरूमा तुलसा शिवाकोटी, रक्षा पाण्डे, सज्जु शिवाकोटी (काफ्ले), रोशन अधिकारी, दीपक पौडेल, नवराज अधिकारी र सोनु चौधरी रहेका छन्। विशेष कार्यक्रम आयोजना गरी नवनिर्वाचित पदाधिकारीहरूको पदस्थापन पनि गरिएको छ।
दमक–६ स्थित सूर्य दर्शन बचत तथा ऋण सहकारी संस्था लिमिटेडको सभाहलमा सम्पन्न कार्यक्रममा सामाजिक व्यक्तित्व डा. लेखनाथ न्यौपानेको प्रमुख आतिथ्यता रहेको थियो। दमकका विभिन्न सामाजिक संघसंस्थाका प्रतिनिधिहरूको सहभागितामा कार्यक्रम सम्पन्न भएको हो।
संस्थाले सामाजिक रूपान्तरणको क्षेत्रमा सक्रिय रूपमा काम गर्दै आएको छ। फजुल खर्च कटाएर सामाजिक सेवा गर्ने लक्ष्यसहित आवश्यकतामा रहेका नागरिक र बस्तीमा पुगेर राहत वितरण, छात्रवृत्ति सहयोग तथा स्वास्थ्य शिविर सञ्चालन जस्ता कार्यक्रमहरू गर्दै आएको संस्थाले जनाएको छ।
