दमक,२७ वैशाख। झापा जिल्लाको दमक सहित विभिन्न क्षेत्रमा गुन्डागर्दी, आपराधिक गतिविधि तथा समाजमा आतंक फैलाउने कार्यमा संलग्न व्यक्तिहरूको विवरण संकलन गर्न प्रहरीले विशेष सूची तयार गरेको जनाएको छ। प्रहरी स्रोतका अनुसार माथिल्लो निकायबाट जिल्लाभर सक्रिय आपराधिक समूह, गुण्डा प्रवृत्तिका व्यक्तिहरू तथा विभिन्न घटनामा संलग्नहरूको विवरण अद्यावधिक गर्न निर्देशन आएपछि यस्तो सूची तयार गरिएको हो।
सूचीमा विगतमा आपराधिक गतिविधिमा संलग्न भई पक्राउ परेका, बारम्बार विवादमा आउने, धम्की, असुली, झैझगडा तथा संगठित अपराधमा नाम जोडिएका व्यक्तिहरू समेटिएको बताइएको छ। प्रहरीले जिल्लाका विभिन्न इलाकाबाट सूचना संकलन गरी निगरानी बढाएको जनाएको छ। विशेषगरी दमक, बिर्तामोड, काँकरभिट्टा लगायत शहरी क्षेत्रमा सक्रिय समूहहरूलाई प्राथमिकतामा राखेर विवरण अद्यावधिक गरिएको स्रोतको भनाइ छ।
प्रहरीका अनुसार शान्ति सुरक्षा कायम राख्न, सम्भावित आपराधिक गतिविधि नियन्त्रण गर्न तथा चुनाव, चाडपर्व वा विशेष समयमा हुन सक्ने घटनालाई रोक्न यस्ता विवरण उपयोगी हुने विश्वास गरिएको छ। यद्यपि प्रहरीले हालसम्म सार्वजनिक रूपमा कसैको नामावली भने सार्वजनिक गरेको छैन।
