काठमाडौं,२९ वैशाख ।राष्ट्रिय स्वतन्त्र पार्टीका सांसद बुद्धरत्न महर्जनले हेलटारदेखि चापागाउँसम्मको सडक स्तरोन्नतिका लागि सरकारको ध्यानाकर्षण गराउनु भएको छ। मंगलबार बसेको प्रतिनिधिसभा बैठकमा बोल्दै उहाँले हेलटारदेखि चापागाउँसम्मको ६२.२ किलोमिटर सडक स्तरोन्नतिको कार्यलाई प्राथमिकतामा राख्न सरकारसँग आग्रह गर्नु भएको छ ।
उहाँले भन्नु भयो, ‘हेलटारदेखि चापागाउँसम्मको ६२.२ किलोमिटरको सडक स्तरउन्नतिको लागि यसै सदन मार्फत विशेष ध्यानाकर्षण गराउन चाहन्छु । चुनावी प्रचारप्रसारका क्रममा देखेका ती कलिला भाइबहिनीको आँखामा छाएको अन्योल, युवाजमातमा छाएको परिवर्तनको हुटहुटी र सम्पूर्ण जनमानसमा देखिएको उत्साह तथा नयाँ पार्टीप्रतिको आशालाई शिरोधार्य गर्ने प्रतिबद्धता यसै सदनमार्फत गराउन चाहन्छु ।’
उहाँले परिवर्तनका लागि जीवन आहुती दिने शहीदहरूको सम्मान र जनमतको कदर गर्न नसके देश विकासका नाराहरू खोक्रो बन्ने टिप्पणी गर्नु भएको छ। महर्जनले भन्नु भयो, ‘अबको दिनमा पनि परिवर्तनका लागि आफ्नो जीवन आहूती दिनुभएका शहीदहरूको कदर गर्न सक्दैनौँ र जनमतको सम्मान गर्न सक्दैनौँ भने देश विकासको खोक्रो नारा बोकेर जनतासमक्ष जानु लज्जास्पद हुनेछ ।’
