काठमाडौँ ,३१ वैशाख। अर्थसचिव घनश्याम उपाध्यायले निजी क्षेत्रको आत्मबल बढाउनु अहिलेको आवश्यकता रहेको बताउनु भएको छ ।
अहिलेको अर्थतन्त्रका लागि निजी क्षेत्रको ठुलो सहयोग चाहिएको उहाँको भनाइ छ । उहाँले सरकारको पहिलो प्राथमिकता सुशासन, त्यसपछि आर्थिक सुधार र पूर्वाधार विकास रहेको स्पष्ट पार्नु भएको छ।
उहाँका अनुसार लगानी नै आर्थिक सुधारको मुख्य आधार हो । विगतमा सरकारले लिएका नीतिका कारण नेपाल सिमेन्ट उत्पादनमा आत्मनिर्भर बन्दै गएको र जलविद्युत् क्षेत्रमा १८ घण्टाको लोडसेडिङबाट विद्युत् निर्यात गर्ने अवस्थासम्म पुगेको उदाहरण उहाँले प्रस्तुत गर्नु भयो ।
उपाध्यायले आयात प्रतिस्थापन र उत्पादनमुखी क्षेत्रलाई सहजीकरण गर्ने नीति सरकारले अघि बढाएको उल्लेख गर्दै अहिले सबैभन्दा आवश्यक कुरा निजी क्षेत्रको विश्वास र सुरक्षा भएको बताउनु भयो । उनले निजी क्षेत्रले सम्पत्तिको सुरक्षा, लगानीको सुरक्षा तथा स्थायित्वको ग्यारेन्टी खोजिरहेको बताए ।
साथै, सार्वजनिक पूर्वाधार विकास र नाफामूलक आयोजनामा निजी क्षेत्रलाई सरकारसँग सहकार्य गराएर अघि बढाउने नीति लिइने संकेत पनि उहाँले दिनु भयो ।
आगामी आर्थिक वर्षको बजेटले विशेषगरी अधुरा आयोजना सम्पन्न गर्ने विषयलाई प्राथमिकतामा राख्ने उहाँले बताउनु भयो ।
