काठमाडौं,२ जेठ । विश्व स्वास्थ्य सङ्गठन (डब्लुएचओ) को सर्वोच्च नीति–निर्माण तह ७९औँ विश्व स्वास्थ्य महासभामा नेपालले यस वर्ष महत्त्वपूर्ण जिम्मेवारी सम्हाल्दैछ । आगामी २०८३ जेठ ३ देखि १० गतेसम्म स्वीट्जरल्याण्डको जेनेभामा आयोजना हुने यस महासभामा नेपालले ‘उपाध्यक्ष’ को भूमिका निर्वाह गर्दै विश्व स्वास्थ्य कूटनीतिमा आफ्नो प्रभाव विस्तार गर्ने भएको छ ।
स्वास्थ्य तथा जनसङ्ख्या मन्त्री निशा मेहताको नेतृत्वमा भोलि(आइतबार)जेनेभा प्रस्थान गर्न लागेको नेपाली प्रतिनिधिमण्डलले यस मञ्चमा नेपालको तर्फबाट नेतृत्वदायी प्रस्तुती दिनेछ ।
अन्तर्राष्ट्रिय मञ्चहरूमा सहभागिता जनाउने क्रममा विगतमा ठुलो सङ्ख्यामा प्रतिनिधिमण्डल पठाउने ‘जम्बो टोली’ को प्रवृत्ति रहँदै आएकोमा, यस पटक सरकारले त्यसमा सुधार गर्दै छरितो र विज्ञहरू सम्मिलित टोली मात्र पठाउने निर्णय गरेको छ ।
परराष्ट्र मन्त्रालयको विवरण अनुसार, कुल नौं सदस्यीय प्रतिनिधिमण्डल मध्ये नेपालबाट मन्त्री मेहतासहित जम्मा तीन जना उच्चपदस्थ अधिकारीहरू मात्र जेनेभा प्रस्थान गर्नेछन् ।
बाँकी ६ जना सदस्यहरू जेनेभास्थित नेपालको स्थायी नियोगबाटै सहभागी हुने व्यवस्था मिलाइएको छ ।
अनावश्यक भ्रमण भत्ता र हवाई भाडा जस्ता प्रशासनिक खर्च कटौती गर्दै, विदेशस्थित कूटनीतिक नियोगको जनशक्तिलाई अधिकतम उपयोग गर्ने सरकारको तयारी छ ।
नेपालबाट प्रस्थान गर्ने अधिकारीहरूः
निशा मेहताः मन्त्री, स्वास्थ्य तथा जनसङ्ख्या मन्त्रालय (प्रतिनिधिमण्डल प्रमुख)
यशोदा अर्यालः सहसचिव, स्वास्थ्य तथा जनसङ्ख्या मन्त्रालय
डा. रोशन न्यौपानेः सहसचिव, स्वास्थ्य तथा जनसङ्ख्या मन्त्रालय
जेनेभास्थित स्थायी नियोगबाट सहभागी हुने अधिकारीहरूः
राम प्रसाद सुवेदीः राजदूत तथा स्थायी प्रतिनिधि
डमरु बल्लभ पौडेलः उप–स्थायी प्रतिनिधि ÷ मन्त्री
सुवाङ्ग पराजुलीः काउन्सिलर
श्रीकृष्ण सिलवालः प्रथम सचिव
रोनल राईः प्रथम सचिव
सुजन लामिछानेः द्वितीय सचिव ।
