सुर्खेत,३ जेठ । नेपाली कम्युनिस्ट पार्टी (नेकपा)का संयोजक तथा पूर्वप्रधानमन्त्री पुष्पकमल दाहाल प्रचण्डले वर्तमान सरकार दुई तिहाइको दम्भमा नागरिक अधिकारलाई बन्देज लगाउन अग्रसर भएको बताउनु भएको छ । सरकारका गतिविधीले लोकतान्त्रिक व्यवस्था टिकाउने चुनौती रहेको उहाँले बताउनु भयो ।
कार्यकर्ता प्रशिक्षणका लागि सुर्खेत पुग्नु भएका प्रचण्डले आइतबार बिहान वीरेन्द्रनगरमा पत्रकार सम्मेलन गर्दै सरकारका क्रियाकलापहरु लोकतान्त्रिक नभएको टिप्पणी गर्नु भएको हो । आफैले बोलाएको सदन भोलिपल्ट रोकेर अध्यादेश ल्याएर सरकारले लोकतन्त्रको उपहास गरेको प्रचण्डको भनाई छ ।
‘नेपालको सन्दर्भमा हालसम्म नभएको अभ्यास वर्तमान सरकारले गरेको छ’ उहाँले भन्नु भयो, ‘त्यसले लोकतन्त्रको उपहास गरेको बुद्धिजीवी र आम नेपालीको बुझाई रहेको तपाईहरुले बुझिरहनु भएकै छ ।’
ट्रेड युनियनको खारेजी, विद्यार्थी संगठनहरुको प्रतिबन्ध लगायतका बिषयहरुले सरकार लोकतान्त्रिक बाटोमा छैन भन्ने देखाएको उहाँको धारणा थियो ।
सरकारले गर्ने लोकतान्त्रिक कार्यहरुमा आफ्नो पार्टीले समर्थन र जनविरोधी क्रियाकलापहरुमा खवरदारी गर्ने उहाँका धारणा थियो । अध्यादेश ल्याउनेदेखि सबै हिसाबले वर्तमान बालेन शाहको नियत राम्रो नदेखिएको प्रचण्डको भनाइ छ ।
सरकारका नागरिक अधिकार विरोधी क्रियाकलापहरुले समर्थन गर्न सकिने अवस्था नरहेको उहाँले बताउनु भयो ।
‘सरकारका राम्रा कामलाई रचनात्मक रुपमा सहयोग गर्नेमा हामी तयार छौ’ उहाँले भन्न्ु भयो, ‘लोकतन्त्रको सुदृढीकरण संविधानको रक्षाका लागि हामी सरकारलाई खवरदारी गरिरहन्छौ ।’
बदलिँदो परिस्थितिमा प्रदेश सरकारहरु पुर्नगठनका लागि काँग्रेस र एमालेबाट मिलेजर जान प्रस्ताव आएको भएपनि आफ्नो पार्टीले इन्कार गरेको उहाँले बताउनु भयो । आफ्नो पार्टी अहिले प्रदेश सरकार परिवर्तनको पक्षमा नरहेको तर सबै पार्टी मिलेर जाने प्रसङ्मा सबै पार्टी मिलेर साझा सरकार बनाउने बिषयमा सहमत हुने प्रस्ताव आफुले प्रस्ताव गरेको उहाँको भनाई छ ।
‘प्रदेश सरकार मिलेर बनाउन कतै एमालेबाट, कतै काँग्रेसबाट प्रस्ताव आइरहेको छ’ उहाँले भन्नु भयो, ‘यसलाई मैले हाम्रो पार्टीको संयोजकको रुपमा इन्कार गरेको छु । बरु काँग्रेस, एमाले र मदेसबादी दलहरु मिलेर साझा सरकार बनाउने भए हाम्रो सहमती रहन्छ भनेको छु ।’
